නව ජාත්‍යන්තර අධ්‍යයනයකට අනුව, බංග්ලාදේශයේ කාන්තා මාධ්‍යවේදිනියන් සහ මාධ්‍ය ක්ෂේත්‍රයේ නියුතු වෘත්තිකයින් තම සේවා ස්ථානය තුළදී ලිංගික හිංසනයට ලක්වීමේ ප්‍රවණතාව ඔවුන්ගේ පිරිමි සගයන්ට වඩා හය ගුණයකින් වැඩි බව හෙළි වී තිබේ.

එමෙන්ම, වෘත්තීයමය වශයෙන් ඇතිවිය හැකි බාධා පිළිබඳ පවතින බිය හේතුවෙන් මෙවැනි සිදුවීම්වලින් බහුතරයක් වාර්තා නොවන බවද එහි දැක්වේ.

බංග්ලාදේශයේ මාධ්‍ය වෘත්තිකයන් 339 දෙනෙකු ඇසුරෙන් සිදුකළ මෙම සමීක්ෂණයට අනුව, සමීක්ෂණයට ලක්වූ කාන්තාවන්ගෙන් 60%ක් වාචික ලිංගික හිංසනයන්ට මුහුණ දී ඇති අතර, පිරිමි පාර්ශවයෙන් ඊට මුහුණ දී ඇත්තේ 9%ක් පමණි.

‘WAN-IFRA Women in News’, ලන්ඩන්හි ‘City St George’s’ විශ්වවිද්‍යාලය සහ ‘BBC Media Action’ යන ආයතන එක්ව රටවල් 21ක මාධ්‍ය වෘත්තිකයන් 2,800කට අධික පිරිසක් ඇසුරෙන් සිදුකළ බහු-රාජ්‍යය අධ්‍යයනයක කොටසක් ලෙස මෙම සොයාගැනීම් ප්‍රකාශයට පත් කර ඇත.

එම සොයාගැනීම්වලට අනුව කාන්තා මාධ්‍ය වෘත්තිකයන්ගෙන් 17%ක් සේවා ස්ථානයේදී ලිංගික හිංසනයට ලක්ව ඇත.

මෙලෙස හිංසනයට ලක්වූවන්ගෙන් අඩකට වඩා වැඩි පිරිසක් එම සිදුවීම් වාර්තා කර නොමැත.

වාර්තා කරන ලද සිදුවීම්වලින් 43%කදීම සේවා යෝජකයන් කිසිදු පියවරක් ගැනීමට අපොහොසත් වී ඇත.

අධ්‍යයනයේ සෙසු ප්‍රධාන සොයාගැනීම් අනුව අන්තර්ජාලය හරහා සිදුවන හිංසනවලදී කාන්තාවන්ගෙන් 48%ක් රැකියාවට අදාළව අන්තර්ජාලය හරහා සිදුවන ලිංගික හිංසනයන්ට මුහුණ දී ඇති අතර, පිරිමින් අතර එම ප්‍රතිශතය 15%කි.

ශාරීරික හිංසන සම්බන්ධයෙන් පවතින අනාවරණ අනුව කාන්තාවන්ගෙන් 24%ක් ශාරීරික ලිංගික හිංසනයන්ට මුහුණ දී ඇති අතර, පිරිමි වෘත්තිකයන්ගෙන් ඒ පිළිබඳ වාර්තා වී ඇත්තේ 4%ක් පමණි.

සිදුවීම් වාර්තා නොකිරීමට හේතු ලෙස බංග්ලාදේශයේ මෙවැනි හිංසනයන්ට මුහුණ දුන් බහුතරයක් දෙනා ඒ පිළිබඳව පැමිණිලි කර නොමැති අතර, මීට ප්‍රධානතම හේතුව වී ඇත්තේ තමන්ගේ වෘත්තීය ජීවිතයට ඉන් ඇතිවිය හැකි අහිතකර බලපෑම් පිළිබඳව පැවති කනස්සල්ල හඳුනාගෙන ඇත.

වාචික හිංසනයට ලක්වූ කාන්තා මාධ්‍ය වෘත්තිකයන්ගෙන් 52%ක්ම තමන් මුහුණ දුන් අතවර පිළිබඳව වාර්තා කර නොමැති බව පවසා ඇත.

එමෙන්ම, වාර්තා කරන ලද සිදුවීම්වලින් 43%කදීම ආයතන ප්‍රධානීන් විසින් කිසිදු ක්‍රියාමාර්ගයක් ගෙන නොමැති බව වාර්තාව පෙන්වා දෙයි.