ලිඳුල ප්‍රදේශයේ තේ වත්තක පදිංචි 13 හැවිරිදි පාසල් සිසුවියක් ගැබිනියක් කිරීමේ සිද්ධියකට සම්බන්ධ 40 හැවිරිදි දෙදරු පියකු ලිඳුල පොලිසිය විසින් අත්අඩංගුවට ගෙන ඇත.

සැකකරු ද එම තේ වත්තේම පදිංචිකරුවෙකි.

9 වැනි ශ්‍රේණියේ ඉගෙනුම ලබන මෙම සිසුවියගේ හැසිරීම පිළිබඳ සැක සිතූ ඇයගේ පාසලේ ගුරුවරියක ඒ බව මවට දැනුම් දී ඇත.

පසුව මව විසින් දියණියගෙන් සිදුකළ විමසීමකින් අනතුරුව, ඒ සම්බන්ධයෙන් ඊයේ (21) ලිඳුල පොලිසියට පැමිණිල්ලක් කර තිබේ.

ඒ අනුව ක්‍රියාත්මක වූ ලිඳුල පොලිසියේ කාන්තා හා ළමා කාර්යාංශයේ නිලධාරීන් සිසුවිය වෛද්‍ය පරීක්ෂණයකට ලක් කිරීම සඳහා රෝහල්ගත කර ඇත.

එහිදී ඇය දෙමසක ගැබිනියක් බව වෛද්‍ය පරීක්ෂණ මගින් තහවුරු වී තිබේ.

අනතුරුව වැඩිදුර වෛද්‍ය වාර්තා ලබා ගැනීම සඳහා ඇය නුවරඑළිය දිස්ත්‍රික් මහ රෝහලේ අධිකරණ වෛද්‍ය නිලධාරීවරයා වෙත යොමු කර ඇත.

සැකකරු අද (22) නුවරඑළිය මහේස්ත්‍රාත් අධිකරණයට ඉදිරිපත් කිරීමට නියමිත අතර, ලිඳුල පොලිසිය වැඩිදුර පරීක්ෂණ සිදු කරයි.