මෙම වසර අවසන් වන විට සියලුම ශ්‍රී ලාංකික පුරවැසියන්ට විද්‍යුත් ගමන් බලපත්‍ර ලැබෙනු ඇතැයි අපේක්ෂා කරන බව ආගමන විගමන දෙපාර්තමේන්තුවේ පාලක ජනරාල් හර්ෂ ඉලුක්පිටිය පවසයි.

විද්‍යුත් විදේශ ගමන් බලපත්‍ර (ඊ-පාස්පෝට්) නිකුත් කිරීමේ මූලික කටයුතු දෙපාර්තමේන්තුව අවසන් කර ඇති බවත්, ප්‍රසම්පාදන කටයුතු මේ වන විට සිදුවෙමින් පවතින බවත් ඔහු සඳහන් කරයි.

උසස් ජෛවමිතික තාක්‍ෂණය ක්‍රියාත්මක කිරීමෙන් සහ සියලුම පුරවැසියන් සඳහා විද්‍යුත් ගමන් බලපත්‍ර නිකුත් කිරීම මගින් බණ්ඩාරනායක අන්තර්ජාතික ගුවන් තොටුපළේ ආරක්ෂාව සහ සංචාරක කාර්යක්ෂමතාව ඉහළ නැංවීමට ද ශ්‍රී ලංකාව මේ වනවිට කටයුතු කර තිබේ.

පොලිසිය සමඟ සහයෝගයෙන්, බණ්ඩාරනායක අන්තර්ජාතික ගුවන් තොටුපළේ මුහුණු හඳුනාගැනීමේ පද්ධතියක් ද මේ වන විට ස්ථාපනය කර ඇත.

ඉදිරි සතිවලදී, පැමිණෙන සහ පිටතට යන සියලුම මගීන් සඳහා අනිවාර්ය ජෛවමිතික දත්ත ලබාගැනීම හඳුන්වාදීමෙන් බණ්ඩාරනායක අන්තර්ජාතික ගුවන් තොටුපළ සිය ආරක්ෂක පියවර පුළුල් කරනු ඇත.

ඊට ඇඟිලි සලකුණු සහ ඡායාරූප ස්කෑන් කිරීම, නිවැරදිව හඳුනාගැනීම සහතික කිරීම සහ ගුවන්තොටුපොළ ආරක්ෂාව තවදුරටත් ශක්තිමත් කිරීම ඇතුළත් වන බව ආගමන විගමන දෙපාර්තමේන්තුවේ පාලක ජනරාල් හර්ෂ ඉලුක්පිටිය මහතා පැවසීය.