එල්නිනෝ සංසිද්ධිය හේතුවෙන් රට තුළ පවතින වියළි කාලගුණික තත්ත්වය තවදුරටත් වර්ධනය වී ඇති අතර එය අප්‍රේල් මාසය දක්වා පැවතිය හැකි බව කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක පවසයි.

ලබන බ්‍රහස්පතින්දා (21), සිකුරාදා (22) සහ සෙනසුරාදා (23) සිට වර්ෂාව අපේක්ෂා කළ හැකි නමුත් උෂ්ණත්වයේ වැඩිවීමක් ද ඇති විය හැකි බව ඔහු මාධ්‍ය වෙත ප්‍රකාශ කළේය.

බස්නාහිර, දකුණ සහ ඌව පළාත්වල වැසි අපේක්ෂා කළ හැකි බව ඔහු පෙන්වා දුන්නේය.

කෙසේවෙතත්, උණුසුම් තත්ත්වය අඩු කිරීමට වර්ෂාව ප්‍රමාණවත් නොවනු ඇත.

පරිසර උෂ්ණත්වය ශරීර උෂ්ණත්වය වන සෙල්සියස් අංශක 37කට සමාන වීම නිසා පීඩාකාරී බවක් දැනෙනු ඇත.

දිවා කාලයේ මෙන්ම රාත්‍රියේදී ද තාපය පවතිනු ඇත.

එබැවින් තාපය පරාවර්තනය වන සුදු ඇඳුම් අඳින ලෙසත් වැඩිපුර ජලය පානය කරන ලෙසත් වෙහෙස මහන්සි වී වැඩ කිරීමෙන් වළකින ලෙසත් දෙපාර්තමේන්තුව ජනතාවගෙන් ඉල්ලා සිටී.