අන්තර්ජාතික වෙළෙඳපොළේ ඉන්ධන මිල ඉහළ යෑම හමුවේ පෞද්ගලික ඉන්ධන සමාගම් දේශීය වෙළෙඳපොළට ඉන්ධන සැපයුම සීමා කිරීම හේතුවෙන් ඉන්ධන පෝලිම් නිර්මාණය වී ඇති බව බලශක්ති අමාත්‍ය අනුර කරුණාතිලක පාර්ලිමේන්තුවේදී පැවසුවේය.

පාර්ලිමේන්තුවේදී මතු කරන ලද ප්‍රශ්නයකට පිළිතුරු දෙමින් අමාත්‍යවරයා මේ බව පැවසුවේය.

අන්තර්ජාතික වෙළෙඳපොළේ මිල ඉහළ ගොස් ඇති පසුබිමක පවතින දේශීය මිල ගණන් යටතේ ඉන්ධන අළෙවි කිරීමට නොහැකි බව පෞද්ගලික සැපයුම්කරුවන් රජයට දැනුම් දී තිබේ.

එහි ප්‍රතිඵලයක් ලෙස, එම සමාගම් වෙළෙඳපොළට නිකුත් කරන ඉන්ධන ප්‍රමාණය අඩු කර ඇති අතර, එය ලංකා ඛනිජතෙල් නීතිගත සංස්ථාවට අමතර බරක් වී ඇති බව ද අමාත්‍යවරයා පෙන්වා දුන්නේය.

මැදපෙරදිග කලාපයේ පවතින යුදමය වාතාවරණය හේතුවෙන් ගෝලීය වෙළෙඳපොළේ ඩීසල් මිල කැපී පෙනෙන ලෙස ඉහළ ගොස් තිබේ.

පෞද්ගලික සැපයුම්කරුවන්ගේ මෙම කප්පාදුව පියවා ගැනීම සඳහා, පසුගිය පෙබරවාරි මාසයට සාපේක්ෂව සංස්ථාව විසින් වෙළෙඳපොළට නිකුත් කරන ඉන්ධන ප්‍රමාණය මේ වන විට වැඩි කර තිබේ.

පෞද්ගලික ඉන්ධන සමාගම් සමඟ ඇති ගිවිසුම් අනුව, එක් එක් පිරවුම්හලට සැපයිය යුතු නිශ්චිත ඉන්ධන ප්‍රමාණයන් නියම කිරීමට රජයට සෘජු බලයක් නොමැති නමුත් රට තුළ අවම ඉන්ධන සංචිත පවත්වාගෙන යාමට සමාගම්වලට බල කිරීමට රජයට හැකියාව ඇත.

අවශ්‍ය අවම සංචිත පවත්වාගෙන යාමට අපොහොසත් වූ ආයතනවලට බලශක්ති අමාත්‍යාංශ‍යේ ලේකම්වරයා දැනටමත් උපදෙස් ලබා දී ඇති බව අමාත්‍යවරයා ප්‍රකාශ කර තිබේ.

තවද, පෞද්ගලික සමාගම් ණය පදනම මත ඉන්ධන අළෙවි නොකිරීමත්, ඛනිජ තෙල් සංස්ථාව දින තුනක ණය පහසුකමක් ලබා දීමත් හේතුවෙන් සංස්ථාවේ ඉන්ධන සඳහා ඇති ඉල්ලුම තවදුරටත් ඉහළ ගොස් ඇත.

සංස්ථාව මෙම අමතර බර භාරගැනීමත් සමඟ එළඹෙන බදාදා හෝ බ්‍රහස්පතින්දා වන විට ගැටළුව විසඳෙනු ඇතැයි අපේක්ෂා කරන බව අමාත්‍යවරයා තවදුරටත් ප්‍රකාශ කර තිබේ.