පෙරහැර සහ අනෙකුත් කටයුතු සඳහා අලින් යොදාගැනීම සම්බන්ධයෙන් පැහැදිලි මාර්ගෝපදේශ පිළිබඳ පොදු එකඟතාවකට පැමිණීමට කාලය පැමිණ ඇති බව ශ්‍රී දළදා මාළිගාවේ දියවඩන නිලමේ ප්‍රදීප් නිලංග දැල පවසයි.

ඔහු මෙම අදහස් පළ කළේ පේරාදෙණිය විශ්වවිද්‍යාලයේදී පැවැත්වුණු ‘ශ්‍රී ලංකා අලි ඇතුන් සංරක්ෂණ සමුළුව 2026’ හි සමාරම්භක උත්සවයේ ප්‍රධාන දේශනය පවත්වමිනි.

වාර්ෂිකව පැවැත්වෙන 400 කට ආසන්න පෙරහැර සංඛ්‍යාවක් සඳහා රට තුළ සිටින්නේ හීලෑ අලි ඇතුන් 93 දෙනකු පමණක් බව ද ඔහු මෙහිදී පෙන්වා දුන්නේය.

ප්‍රදීප් නිලංග දැල හීලෑ අලි ඇතුන්ගේ සංගමයේ සභාපතිවරයා ලෙසද කටයුතු කරයි.

අලින් සම්බන්ධයෙන් විවිධ මත පළවුවද, බුදුරජාණන් වහන්සේගේ කාලයේ සිටම අලියා යනු ගැඹුරු අර්ථයන් සංකේතවත් කළ සත්වයෙකු බවත්, ඔවුන් ‘අප අතර සැමදා රැඳී සිටින’ බවත් දියවඩන නිලමේවරයා වැඩිදුරටත් පැවසීය.

විවිධ සංගම්වල සහයෝගය ඇතිව පැවැත්වුණු මෙම සමුළුවේ ප්‍රධාන සංවිධායකවරයා ලෙස මහාචාර්ය අශෝක දංගොල්ල කටයුතු කළේය.