ගෝලීය තෙල් සැපයුමට ඇති බාධාවන් හමුවේ, ලබන සතියේ රුසියාව සමඟ තෙල් මිලදී ගැනීමේ ගිවිසුමක් අවසන් කිරීමට ශ්‍රී ලංකාව අපේක්ෂා කරන බව ලංකා ඛනිජ තෙල් සංස්ථාවේ සභාපති ඩී.ජේ. රාජකරුණා පවසා තිබේ.

වත්මන් බලශක්ති අර්බුදය මඟහරවා ගැනීම සඳහා රුසියානු ඉන්ධන මිලදී ගැනීමේ හැකියාව පිළිබඳ විදේශ කටයුතු අමාත්‍ය විජිත හේරත් රුසියානු තානාපති ලෙවන් එස්. ධාගරියන් සමඟ මීට පෙර සාකච්ඡා පැවැත්වීය.

ඉන්පසුව, කොළඹ රුසියානු තානාපති කාර්යාලය ශ්‍රී ලංකාවේ ඉල්ලීම රුසියානු බලධාරීන්ගේ සළකා බැලීම සඳහා මොස්කව් වෙත යොමු කර තිබේ.

ලංකා ඛනිජ තෙල් සංස්ථාවේ සභාපති ඩී.ජේ. රාජකරුණා පවසා ඇත්තේ මේ මොහොතේ එම කාරණය සාකච්ඡා කරමින් පවතින බවයි.

රුසියාවෙන් මාස තුනක් සඳහා අවශ්‍ය බොරතෙල් සහ පිරිපහදු කළ නිෂ්පාදන මිලදී ගැනීමට ශ්‍රී ලංකාව අපේක්ෂා කරන බව ඔහු සඳහන් කර තිබේ.

“ලබන සතියේ අවසන් තීරණයක් ගැනීමට අපි බලාපොරොත්තු වෙනවා,” යනුවෙන් ඔහු පවසා ඇත.

රුසියාව බොහෝ දුරට තම තෙල් අපනයන ඇමරිකානු ඩොලරයෙන් ඉවතට මාරු කර ඇති අතර, ප්‍රධාන වශයෙන් රුසියානු රූබල් හෝ චීන යුවාන්වලින් ගෙවීම අවශ්‍ය වේ.

ශ්‍රී ලංකාව එය කෙසේ විසඳනු ඇත්දැයි කළ විමසීමකට, “ලබන සතියේ සියල්ල විසඳනු ඇති” යනුවෙන් ඔහු ප්‍රකාශ කර ඇත.

මීට පෙර, ඇමරිකානු සම්බාධක හේතුවෙන් ශ්‍රී ලංකාවට රුසියාවෙන් තෙල් මිලදී ගැනීමට නොහැකි විය.

ඉරානය සමඟ එක්සත් ජනපද-ඊශ්‍රායල් යුද්ධය නිසා ඇති වූ බලශක්ති සැපයුම් අර්බුදය සමනය කිරීම සඳහා මුහුදේ යාත්‍රාවල දැනටමත් පටවා ඇති රුසියානු තෙල් සහ ඛනිජ තෙල් මිලදී ගැනීමට හැකිවන පරිදි එක්සත් ජනපදය සම්බාධක ලිහිල් කර ඇත.

බලශක්ති සහ පිරිසිදු වාතය පිළිබඳ පර්යේෂණ මධ්‍යස්ථානයේ (CREA) සංඛ්‍යාලේඛනවලට අනුව, පෙබරවාරි 28 වැනිදා ආරම්භ වූ ඉරානයට එරෙහි යුද්ධයේ පළමු සති දෙක තුළ රුසියාව තෙල් අලෙවියෙන් යුරෝ මිලියන 672ක් උපයා ඇත.