කැනඩාවේ 29 හැවිරිදි ඩැනියල් මැගාහි (Danielle McGahey) 2024 කාන්තා T20 ලෝක කුසලානය සඳහා සුදුසුකම් ලැබීමත් සමඟ, නිල අන්තර්ජාතික තරඟයකට ක්‍රීඩා කරන පළමු සංක්‍රාන්ති ලිංගික ක්‍රිකට් ක්‍රීඩිකාව බවට පත්වීමට නියමිත වේ.

කැනඩා කණ්ඩායම ලබන සතියේ ලොස් ඇන්ජලීස්හි පැවැත්වීමට නියමිත ICC අමෙරිකා සුදුසුකම් ලැබීමේ තරඟයේදී ආර්ජන්ටිනාව, බ්‍රසීලය සහ එක්සත් ජනපදය සමඟ ගෝලීය සුදුසුකම් ලැබීමේ තරඟ සඳහා සහභාගී වනු ඇත.

ඕස්ට්‍රේලියානු ජාතික ඇය, 2020 පෙබරවාරි මාසයේදී කැනඩාවට සංක්‍රමණය වී ඇති අතර 2020 නොවැම්බර් මාසයේදී පිරිමි පුද්ගලයෙක්ව සිට කාන්තාවක් දක්වා පරිවර්තනය වීමට ආරම්භ වී ඉන් පසුව 2021 මැයි මාසයේදී ශාරීරික වශයෙන් වෙනස් වී තිබේ.

ඇය විසින් ටෙස්ටොස්ටෙරෝන් මට්ටම් මත පදනම් වූ සංක්‍රාන්ති ලිංගික ක්‍රීඩකයන් පිළිබඳ, අන්තර්ජාතික ක්‍රිකට් කවුන්සිලයේ [ICC] රෙගුලාසි සම්පූර්ණ කර ඇත.

ඇය BBC Sport වෙත සඳහන් කර ඇත්තේ, තමන් ටෙස්ටොස්ටෙරෝන් මට්ටම තීරණය කිරීම සඳහා වසර දෙකකට වැඩි කාලයක් තිස්සේ සෑම මසකම රුධිර පරීක්ෂණ සිදුකරන බවය.