August 24, 2023
ශ්‍රී ලංකා රේගුව විසින් බුද්ධිමය දේපළ අයිතිවාසිකම් ආරක්ෂා කරමින් ව්‍යාපාරික විශ්වාසය ඉහළ නැංවීම සඳහා රුපියල් මිලියන 88 ක් වටිනා ව්‍යාජ භාණ්ඩ 62,900ක් විනාශ කර තිබේ.
රේගුව පවසන්නේ, පිළිගත් අන්තර්ජාතික සන්නාම යටතේ ආනයනය කරන ලද ඔයිල් ෆිල්ටර, දත්ත කේබල් සහ දුරකථන චාජර් ඇතුළු ව්‍යාජ භාණ්ඩ රැසක් මෙලෙස විනාශ කරන ලද බවයි.
ශ්‍රී ලංකා රේගුව වෙනම නිවේදනයක් නිකුත් කරමින් පවසන්නේ, මෙම විනාශය නීත්‍යානුකූල ව්‍යාපාර අඩපණ කිරීමට පමණක් නොව, ගනුදෙනුකරුවන්ට අවදානම් ද ඇති කරන ව්‍යාජ නිෂ්පාදන සංසරණය මැඩලීමේ පුළුල් උපාය මාර්ගයක කොටසක් බවයි.
“ව්‍යාජ භාණ්ඩ මිලදී ගැනීමේදී ඇති විය හැකි අවදානම් පිළිබඳව මහජනතාව දැනුවත් කිරීමේ අවශ්‍යතාවය ද මෙම මෙහෙයුම මගින් අවධාරණය කෙරේ. විශේෂයෙන්ම අන්තර්ජාලය හරහා මිලදී ගැනීම් සිදුකිරීමේදී සුපරීක්ෂාකාරී වන ලෙසත්, ගුණාත්මකභාවය සහ ආරක්ෂාව තහවුරු කරන නීත්‍යානුකූල ව්‍යාපාරවලට සහාය වන ලෙසත් පාරිභෝගිකයින්ගෙන් ඉල්ලා සිටියි.” යනුවෙන් රේගුව වැඩිදුරටත් ප්‍රකාශ කරයි.
