කොළඹ වරායේ නැගෙනහිර බහාලුම් පර්යන්තයේ ඉදිකිරීම් ප්‍රමාදය හේතුවෙන් එහි කොන්ත්‍රාත්කරුට රුපියල් මිලියන 4,227ක් වන්දි වශයෙන් ඉල්ලා සිටීමට හැකි වී ඇති බව පොදු ව්‍යාපාර කමිටුව හෙවත් කෝප් කමිටුව(COPE) හමුවේ ප්‍රකාශ වී තිබේ.

මේ සතියේ පැවති කෝප් කමිටු රැස්වීමකදී සිදු කෙරුණු දීර්ඝ සාකච්ඡා අතරතුර මෙම කරුණු අනාවරණ විය.

කෝප් කමිටු සභාපති නිශාන්ත සමරවීරගේ ප්‍රධානත්වයෙන් පැවති රැස්වීමේදී, කමිටුව විසින් 2022 සහ 2023 සඳහා විගණකාධිපති වාර්තා සහ ශ්‍රී ලංකා වරාය අධිකාරියේ වත්මන් කාර්යසාධනය පිළිබඳ සිය නිරීක්ෂණ නැවත ආරම්භ කළේය.

විගණකාධිපති වාර්තාවේ මතු කරන ලද සමහර ගැටළු සැප්තැම්බර් 10 වැනිදා පැවති කෝප් කමිටු රැස්වීමකදී සාකච්ඡා කර තිබිණි.

කොළඹ වරායේ නැගෙනහිර බහාලුම් පර්යන්තයේ සංවර්ධන කටයුතු වෙනුවෙන් සමාගමකට රුපියල් මිලියන 40,273ක කොන්ත්‍රාත්තුවක් ප්‍රදානය කිරීම සඳහා 2021 නොවැම්බර් මාසයේදී කැබිනට් අනුමැතිය ලබා දී ඇති බව කමිටුව සඳහන් කළේය.

2021 දෙසැම්බර් මාසයේදී අත්සන් කරන ලද ගිවිසුම්වලට අනුව, ඉදිකිරීම් කටයුතු 2025 ජනවාරි 3 වැනිදා වන විට අවසන් කළ යුතුව තිබූ බව ද සඳහන් විය.

කෙසේවෙතත්, හේතු කිහිපයක් නිසා, ඉදිකිරීම් කටයුතු ප්‍රමාද වූ අතර, කාල සීමාව දීර්ඝ කිරීමෙන් පසු, ඉදිකිරීම් කටයුතු 2026 ජූලි මාසයේදී අවසන් කිරීමට දැන් සැලසුම් කර ඇති බව අනාවරණ විය.

දින 548ක ප්‍රමාදය හේතුවෙන්, කොන්ත්‍රාත්කරු විසින් වන්දි වශයෙන් රුපියල් මිලියන 4,227ක් ඉල්ලා ඇති බව රැස්වීමේදී පෙනී ගොස් තිබේ.

ඒ අනුව අදාළ සියලු විස්තර අඩංගු වාර්තාවක් කැඳවීමට කෝප් සභාපතිවරයා කටයුතු කළේය.

රැස්වීමට සහභාගී වූ ශ්‍රී ලංකා වරාය අධිකාරියේ නිලධාරීන් ප්‍රකාශ කළේ ඉදිකිරීම් කටයුතු වේගයෙන් සිදු කෙරෙන අතර කඩිනමින් අවසන් කරන බවයි.

වරාය අධිකාරියේ සේවකයන්ගේ ආහාර වියදම් කෙරෙහි ද කමිටුවේ අවධානය යොමු වූ අතර, 2023 දී කෝප් කමිටුව විසින් ලබා දුන් නිර්දේශ ක්‍රියාත්මක කර නොමැති බව කමිටුව සඳහන් කළේය.

වියදම් අඩු කිරීමට මේ වන විට පියවර ගෙන ඇති බවත්, පිරිවැය අවම කිරීම සඳහා තරඟකාරී ටෙන්ඩර් පටිපාටියක් හඳුන්වා දී ඇති බවත් එහිදී නිලධාරීන් ප්‍රකාශ කර තිබිණි.

වරාය අධිකාරියට අයත් ඉඩම් නැවත අත්පත් කර ගැනීම කෙරෙහි අවධානය යොමු කරමින්, අධිකරණය විසින් දුන් ඉවත් කිරීමේ නියෝග නොසළකා හැර තිබේ නම් තවදුරටත් නීතිමය ක්‍රියාමාර්ග ගත යුතු බව කෝප් සභාපතිවරයා අවධාරණය කළේය.

මේ සම්බන්ධයෙන් අවශ්‍ය පියවර දැනටමත් ගෙන ඇති බව නිලධාරීන් සඳහන් කර ඇත.