චීනය විසින් තෙල් පිරිපහදු ආයතනවලට සියලුම ඉන්ධන අපනයනයන් නතර කරන ලෙස දැනුම් දී ඇති බවට වාර්තා වීමත් සමඟ, ද්‍රව ඉන්ධන හිඟයකට සහ මිල ඉහළ යාමකට ඕස්ට්‍රේලියාවේ ඇති අවදානම තවත් දැඩි වී තිබේ.

ඉරාන ගැටුම පවතින කාලසීමාව සහ එය තෙල් සැපයුමට කරන බලපෑම පිළිබඳව පවතින ගෝලීය අවිනිශ්චිතතාවයට මෙය තවත් එක් වූවකි.

චීනය සියලුම අපනයනයන් නතර කරන ලෙස තෙල් පිරිපහදු කරන්නන්ට දැනුම් දී ඇති බවත්, ඒ හේතුවෙන් ඕස්ට්‍රේලියාවට එවීමට නියමිතව තිබූ අවම වශයෙන් භාණ්ඩ තොග දෙකක් (cargoes) පිළිබඳව සැක මතු වී ඇති බවත් සිකුරාදා ‘ඕස්ට්‍රේලියානු ෆයිනෑන්ෂල් රිවීව්’ (Australian Financial Review) පුවත්පත වාර්තා කළේය.

ලොව වැදගත්ම ප්‍රවාහන මාර්ගය වන හෝමුස් සමුද්‍ර සන්ධියේදී ප්‍රවාහන නෞකා දෙකක් ද පිපිරී ඇති අතර, මෙම ගැටුම පවතින තාක් ඉදිරියට නෞකා මෙම ගමන් මාර්ගය භාවිතා නොකිරීමට බොහෝ දුරට ඉඩ ඇත.

මෙයින් අදහස් කරන්නේ චීනය වැනි ආසියානු පිරිපහදු මධ්‍යස්ථාන වෙත ලැබෙන තෙල් ප්‍රමාණය සැලකිය යුතු ලෙස අඩු වී ඇති බවයි.

මෙම සැපයුම් හිඟය හේතුවෙන්, එම පිරිපහදු කරන රටවලට ඔවුන්ගේම පෙට්‍රල්, ඩීසල් සහ ජෙට් ඉන්ධන සඳහා වන උපායමාර්ගික අවශ්‍යතා පිළිබඳව නැවත තක්සේරු කිරීමට සිදුවනු ඇත.

සමස්තයක් ලෙස ආසියානු රටවල් ඔවුන්ගේ තෙල් අවශ්‍යතාවයෙන් 90%ක් දක්වා ලබාගන්නේ මැදපෙරදිග කලාපයෙනි.

ද්‍රව ඉන්ධන ශුද්ධ ආනයනකරුවෙකු ලෙස ඕස්ට්‍රේලියාව, ආසියානු පිරිපහදු මධ්‍යස්ථානවලින් සිදුකරන අපනයනයන් මත බෙහෙවින් යැපෙයි. ජෙට් ඉන්ධන (Jet fuel) සම්බන්ධයෙන් මෙය විශේෂයෙන්ම සත්‍ය වේ.

ජෙට් ඉන්ධන සැපයුම අඩාල වීම හමුවේ ඕස්ට්‍රේලියාව පවතින අවදානම පිළිබඳව ගුවන් සේවා විශේෂඥයෝ කලක සිට අනතුරු අඟවා ඇත.

උදාහරණයක් ලෙස, සිඩ්නි ගුවන් තොටුපළේ ප්‍රධාන විධායක නිලධාරී ස්කොට් චාල්ටන් පෙන්වා දී ඇත්තේ සිඩ්නි නුවර සම්පූර්ණයෙන්ම ජෙට් ඉන්ධන ආනයනය මත යැපෙන බවත්, ඔවුන් සතුව කිසිදු පිරිපහදු ධාරිතාවක් නොමැති බවත්ය.