ඔක්තෝබර් මාසයේ මෙරටට පැමිණීමට නියමිත බව පැවසුණු ෂී යාන් 6(Shi Yan 6) නමැති ආන්දෝලනාත්මක චීන පර්යේෂණ නෞකාව, අවසානයේ ශ්‍රී ලංකා මුහුදු තීරයට ඇතුළුවීමට අවසර ලබාදෙන ලෙස ඉල්ලා ඇත.

ශ්‍රී ලංකා විදේශ අමාත්‍යාංශය පවසන්නේ, චීනය විසින් ෂී යාන් 6 නැව්ගත කිරීමට අවසර ඉල්ලා ඇති නමුත් ඒ සඳහා දිනයක් සඳහන් කර නොමැති බවත්, එම ඉල්ලීම ඉටුකිරීමට කටයුතු කරමින් සිටින බවත්ය.

චීන රාජ්‍ය විකාශක CGTN නාලිකාව විසින් ෂී යාන් 6 හඳුන්වනු ලබන්නේ සාගර විද්‍යාව, සමුද්‍ර භූ විද්‍යාව සහ සමුද්‍ර පරිසර විද්‍යා පරීක්ෂණ සිදුකරන 60 දෙනෙකුගෙන් සමන්විත “විද්‍යාත්මක පර්යේෂණ යාත්‍රාවක්” ලෙසිනි.

ඔත්තු බැලීමේ නෞකාවක් ලෙස නවදිල්ලිය විසින් විස්තර කරන ලද, අභ්‍යවකාශ යානා ලුහුබැඳීම පිළිබඳ විශේෂඥතාවක් ඇති චීන පර්යේෂණ නෞකාවක් වන යුවාන් වැන්ග් 5 පසුගිය වසරේ හම්බන්තොට වරායට පැමිණීම සම්බන්ධයෙන් ඉන්දියාව බරපතල කනස්සල්ල පළ කළේය.

මෙම ෂී යාන් 6 නෞකාව සම්බන්ධයෙන්ද ඉන්දියාව මේ වන විට සිය කනස්සල්ල පළකර ඇත.

මේ අතර ජාතික ජලජ සම්පත් පර්යේෂණ හා සංවර්ධන නියෝජිතායතනය හෙවත් නාරා ආයතනය පවසන්නේ රුහුණු විශ්ව විද්‍යාලය සමග එක්ව ශ්‍රී ලංකාවේ දකුණු මුහුදු තීරයේ පර්යේෂණ කටයුතු සිදුකරනු ඇති බවයි.

මේ අතර චීනය සහ ශ්‍රී ලංකාව අතර අත්සන් කරන ලද රහසිගත නාවික ගිවිසුමක් පිළිබඳවද තොරතුරු අනාවරණය වී තිබේ.