පිරිමි හෝ කාන්තා T20 ක්‍රිකට් තරගයක එක් ඉනිමකදී කඩුලු නවයක් දවාගත් පළමු ක්‍රීඩිකාව බවට පත්වෙමින් වාර්තා පොත්වලට තම නම ඇතුළත් කරගන්නට බ්‍රසීලයේ ලෝරා කාර්ඩෝසෝ සමත් වී තිබේ.

ලෙසෝතෝ කණ්ඩායමට එරෙහිව කාර්ඩෝසෝ මෙම පන්දු යැවීම සිදු කළ අතර, ඇයගේ ඕවර තුනේදී ලකුණු 9/4ක අසාමාන්‍ය පන්දු යැවීමක් සටහන් විය.

එය T20 ක්‍රිකට් තරග ඉතිහාසයේ හොඳම පන්දු යැවීමයි.

මීට පෙර හොඳම පන්දු යැවීමේ වාර්තාවට හිමිකම් කීවේ 2025 දී මියන්මාරයට එරෙහිව පිරිමි T20 තරගයකදී ලකුණු හතකට කඩුලු අටක් දවාගත් භූතානයේ සෝනම් යෙෂේය.

කාන්තා T20 තරගයකදී, 2024 දී මොන්ගෝලියාවට එරෙහිව ඉන්දුනීසියාවේ රොහ්මාලියා රොහ්මාලියාගේ 7/0ක් ලෙස සටහන් කර තිබු වාර්තාව කාර්ඩෝසෝ අභිබවා ගියේය.

තරගයේ මුල් භාගයේදී, බ්‍රසීලය රොබර්ටා ඇවරි (පන්දු 35න් ලකුණු 48) සහ මොනිකේ මචාඩෝ (පන්දු 41 න් 69*) ගේ ආකර්ෂණීය ඉනිම් හේතුවෙන් ලකුණු 202ක් රැස් කරගෙන තිබිණි.

කාර්ඩෝසෝගේ ඇදහිය නොහැකි පන්දු යැවීම ආරම්භ වූයේ දෙවැනි ඕවරයේදී හැට්ට්‍රික් එකක් ලබා ගැනීමත් සමඟය.

ඇය සිව්වැනි ඕවරයේදී තවත් කඩුලු හතරක් දවා ගනිමින් ඇගේ කඩුලු සංඛ්‍යාව හත දක්වා ගෙන ගියාය.

හයවැනි ඕවරයේදී අමතර කඩුලු දෙකක් ලබා ගැනීමත් සමග ඉනිමකදී කඩුලු නවයක වාර්තාවට හිමිකම් කියන්නට ඇය සමත් වූවාය.

අවසන් කඩුල්ල මේරියන් ආටර් විසින් ලබා ගත් අතර, ලෙසෝතෝ කණ්ඩායම ඕවර 6.2 කදී ලකුණු 13කට පමණක් දැවී ගිය අතර බ්‍රසීලයට ලකුණු 189ක දැවැන්ත ජයග්‍රහණයක් හිමිවිය.