ගාල්ල, බද්දේගම, අගලිය ප්‍රදේශයේදී ගිනි තබා තිබූ මෝටර් රථය රජයේ රස පරීක්ෂක දෙපාර්තමේන්තුවේ නිලධාරීන් විසින් අද (17) උදෑසන පරීක්ෂා කර තිබේ.

පොලිසිය සැක පළ කරන්නේ එය අකුරේගොඩ ද්විත්ව ඝාතනයට සම්බන්ධ සැකකරුවන් විසින් භාවිත කරන ලද බවටයි.

මෙම වාහනය 2026 පෙබරවාරි 15 ​​වැනිදා ගාල්ල, අගලිය ප්‍රදේශයේ අතුරු මාර්ගයක දමාගොස් තිබියදී නුගේගොඩ කොට්ඨාස අපරාධ විමර්ශන කාර්යාංශයේ නිලධාරීන් විසින් සොයා ගන්නා ලදී.

පොලිසියට අනුව, මෝටර් රථය සොයා ගන්නා අවස්ථාවේ දී ගිනිගෙන දැවී තිබිණි.

ලැබුණු තොරතුරුවලට අනුව, නීතිඥ බුද්ධික මල්ලවාරච්චි සහ ඔහුගේ බිරිඳ ඝාතනය කිරීම සඳහා තුවක්කුකරුවන් භාවිත කළ බව කියන මෙම වාහනය අගලිය ප්‍රදේශයේ අතහැර දමා ගොස් තිබිණි.

පොලිස් නිලධාරීන් එම ස්ථානයට ගොස් වාහනය ගිනි තබා ඇති බව තහවුරු කර ගනු ලැබිණි.