වාර්ගික සමානාත්මතාවය සහ යුක්තිය සඳහා එක්සත් ජනපදයේ විශේෂ නියෝජිත Desirée Cormier Smith, ශ්‍රී ලංකාව කේන්ද්‍රස්ථානයක් කර ගනිමින් දකුණු ආසියාවේ සිය සංචාරය ආරම්භ කිරීමට නියමිතව ඇත.

ඇය දෙසැම්බර් 11 වැනිදා සිට 15 වැනිදා දක්වා ශ්‍රී ලංකාව තුළ මානව හිමිකම් සහ සමානාත්මතාවය ඉදිරියට ගෙනයෑම සඳහා එක්සත් ජනපද රජයේ කැපවීම ශක්තිමත් කිරීමට විවිධ ප්‍රජාවන් සමඟ සම්බන්ධ වෙමින් කොළඹ, නුවරඑළිය සහ මහනුවර යන ප්‍රදේශවල සංචාරය කරනු ඇත.

සතියක සංචාරය අතරතුර ඇය මලයියාහ දෙමළ ජනතාව, සිවිල් සමාජ කණ්ඩායම් සහ රාජ්‍ය නිලධාරීන් සමඟ තීරණාත්මක රැස්වීම්වල නිරත වේ.

ශ්‍රී ලංකාවේ ආන්තික ජනවාර්ගික ප්‍රජාවන් නඟා සිටුවීමේ අරමුණ සඳහා එක්සත් ජනපදයේ නොසැලෙන සහයෝගය මෙම සාකච්ඡා මගින් අවධාරනය කරනු ඇත.

ඇයගේ සංචාරයේ විශේෂත්වය වනුයේ නුවරඑළියේ එක්සත් ජනපද තානාපති උප කාර්යාලයේ ඉංග්‍රීසි ප්‍රවේශ ශිෂ්‍යත්ව වැඩසටහන දියත් කිරීමයි.

මලයියාහ දෙමළ ප්‍රජාවේ තරුණ තරුණියන් සවිබල ගැන්වීමේ අරමුණින්, ඇය විසින්,ඊට අදාළව වැඩසටහන් සාර්ථකව නිම කළ සිසුන් 25 දෙනෙකුට සම්මාන පිරිනැමීමට නියමිතය.

මෙම නවෝත්පාදන වැඩසටහන තරුණ පුද්ගලයන් වටිනා රැකියා කුසලතා වලින් සන්නද්ධ කිරීම, ඔවුන්ගේ ආර්ථික අපේක්ෂාවන් වැඩිදියුණු කිරීම සහ ඔවුන්ගේ ප්‍රජාවේ සමස්ත සංවර්ධනයට දායක වීම අරමුණු කරයි.