May 19, 2026
බියර් නිෂ්පාදනයේදී සහල් සහ සීනි ප්රාථමික අමුද්රව්ය ලෙස භාවිත කිරීම සඳහා අනුමැතිය ලබා නොදෙන ලෙස සුරාබදු කොමසාරිස් ජනරාල්වරයාට සහ අනෙකුත් බලධාරීන්ට නියෝග කරන ලෙස ඉල්ලා අභියාචනාධිකරණය හමුවේ රිට් පෙත්සමක් ගොනු කර තිබේ.
බලපත්රලාභී මත්පැන් සිල්ලර වෙළෙන්දන් පිරිසක් විසින් ගොනු කරන ලද මෙම පෙත්සමේ වගඋත්තරකරුවන් ලෙස සුරාබදු කොමසාරිස් ජනරාල්, සුරාබදු දෙපාර්තමේන්තුවේ නිලධාරීන්, ශ්රී ලංකා ප්රමිති ආයතනයේ නිලධාරීන්, නීතිපතිවරයා, පොලිස්පතිවරයා සහ තවත් කිහිප දෙනෙකු නම් කර ඇත.
සුරාබදු ආඥා පනතේ 2 වැනි වගන්තිය යටතේ ‘බියර්’ මෝල්ට්වලින් සාදන ලද පැසුණු මධ්යසාර පානයක් ලෙස අර්ථ දක්වා ඇති බව පෙත්සම්කරුවෝ පවසති.
කෙසේවෙතත්, බොහෝ වත්මන් නිෂ්පාදකයන් බියර් නිෂ්පාදනයේ ප්රධාන අමුද්රව්ය ලෙස සහල් සහ සීනි භාවිත කරන බවත්, එය සුරාබදු නීතියේ විධිවිධානවලට පටහැනි බවටත් ඔවුහු චෝදනා කරති.
රාජ්ය අරමුදල්වලින් සැළකිව යුතු මහජන සහනාධාර සහිතව නිෂ්පාදනය කරන සහල්, බියර් නිෂ්පාදනය වැනි වාණිජ කර්මාන්තවලට යොමු කරන බවත්, එමඟින් ජාතික ආර්ථිකයට අහිතකර බලපෑම් ඇති කරන බවටත් ඔවුහු තවදුරටත් තර්ක කරති.
මෙම ක්රියාව ශ්රී ලංකාව සහල් නිෂ්පාදනයේ ස්වයංපෝෂිතභාවය අත්කර ගැනීමට අරගල කළ හැකි තත්ත්වයක් නිර්මාණය කරන බව ද ඔවුහු කියා සිටිති.
පෙත්සම්කරුවන් වැඩිදුරටත් පෙන්වා දෙන්නේ ශ්රී ලංකා ප්රමිති ආයතනය මධ්යසාර නිෂ්පාදන ප්රමිතීන් නිරීක්ෂණය කිරීම සඳහා වත්මන් අවශ්යතාවලට ගැළපෙන පරිදි එහි නියාමන රාමුව යාවත්කාලීන කර නොමැති බවයි.
ඒ අනුව, සුරාබදු කොමසාරිස් ජනරාල් සහ අනෙකුත් වගඋත්තරකරුවන් විසින් බියර් නිෂ්පාදනයේ ප්රාථමික අමුද්රව්ය ලෙස සහල් සහ සීනි අනුමත කිරීම වැළැක්වීමේ නියෝගයක් නිකුත් කරන ලෙස ඔවුන් අභියාචනාධිකරණයෙන් ඉල්ලා තිබේ.
