අධිකරණයට ගරු කරන ලෙසත් එහි ස්වාධීනත්වය ආරක්ෂා කරන ලෙසත් ඉල්ලා විපක්ෂයේ විවිධ පක්ෂ නියෝජනය කරන මන්ත්‍රීවරුන් 25 දෙනෙකු පමණ ජනාධිපති අනුර කුමාර දිසානායක වෙත ලිපියක් යොමු කිරීමට සැලසුම් කර තිබේ.

2026 මැයි 25 වැනිදාට නියමිත අධිකරණ තීන්දුවකට ප්‍රීති ඝෝෂා කිරීමට සූදානම් වන ලෙස ජනාධිපති දිසානායක ජනතාව වෙත කළ ප්‍රකාශය ඔවුන් මෙම ලිපියේ සඳහන් කර ඇත.

සජිත් ප්‍රේමදාස, දිලිත් ජයවීර, රෝහිත අබේවර්ධන, චාමර සම්පත් දසනායක, ගයන්ත කරුණාතිලක, ඉම්රාන් මහරූෆ්, රංජිත් මද්දුම බණ්ඩාර, හේෂා විතානගේ, හර්ෂණ රාජකරුණා, නිසාම් කාරියප්පර්, රවුෆ් හකීම්, හෙක්ටර් අප්පුහාමි, අජිත් පී. පෙරේරා, එස්.එම්. මරික්කාර්, රෝහණ බණ්ඩාර, සුජීව සේනසිංහ සහ දිලිප් වෙදආරච්චි ඇතුළු මන්ත්‍රීවරුන් ජනාධිපතිවරයාගෙන් ඉල්ලා ඇත්තේ ඔහු කළ එම ප්‍රකාශය ඉල්ලා අස්කර ගන්නා ලෙසයි.