සංවිධානාත්මක පිරිසක් විසින් තවත් බන්ධනාගාර 05ක ගැටුම් ඇති කර මහා විනාශයක් සිදුකර මුළු රටම අවුල් ජාලයක් කිරීමේ සැලසුමක් පිළිබඳව තොරතුරු බුද්ධි අංශ විසින් අනාවරණය කරගෙන ඇති බව ‘දිවයින’ පුවත්පත වාර්තා කරයි.

එම වාර්තාවේ වැඩිදුරටත් මෙසේ සඳහන් වේ.

‘මීගමුව සහ මහර බන්ධනාගාරවල ඇති වූ ගැටුම් පිටුපස ද මෙම සංවිධානාත්මක කණ්ඩායම සිටින බවට තොරතුරු හෙළි වෙමින් පවතියි.

බුද්ධි අංශ ආරංචි මාර්ග පවසන අන්දමට දුම්බර, කළුතර, ගාල්ල, කොළඹ මැගසින් සහ වැලිකඩ කාන්තා බන්ධනාගාරවල මෙම ගැටුම් ඇති කිරීමේ සැලසුම් ඇති බවද වාර්තා වෙයි.

බන්ධනාගාරවල මේ ආකාරයේ ගැටුම් ඇති කර රටම අවුල් ජාලයක් කිරීමේ සැලසුම් පිටුපස දේශපාලනඥයන් කීපදෙනකුත් බන්ධනාගාරයේ උසස් නිලධාරීන් කීපදෙනකු සහ බන්ධනාගාරවල රඳවා සිටින රැඳවියන් පිරිසකුත් සිටින බවට තොරතුරු මේ වනවිට හෙළි වී ඇත.

මේ සම්බන්ධයෙන් පුළුල් විමර්ශන මේ වනවිටත් ක්‍රියාත්මක කර තිබෙන බවද ආරංචි මාර්ග කියා සිටියේය.

මහර බන්ධනාගාරයේ ඇති වූ ගැටුමින් එහි දේපළවලට රුපියල් කෝටි 15කට අධික අලාභයක් සිදු වී තිබිණි. මෙම ගැටුම ඇතිවීමට නිශ්චිත හේතුවක් මෙතෙක් අනාවරණය වී නැත. නිශ්චිත හේතුවක් නොමැතිව මෙම ගැටුම ඇති කර තිබුණේ මෙම සංවිධානාත්මක කණ්ඩායමේ මෙහෙයවීමෙන් බවට විමර්ශන නිලධාරීහු සැක පහළ කරති.

මේ වනවිට රටේ සියලුම බන්ධනාගාරවල ආරක්ෂාව තරකර ඇති බවද වාර්තා වෙයි.’