රුපියල් ලක්ෂ 2ක් පමණ වටිනා විසිතුරු පැළ නීති විරෝධී ලෙස රට තුළට රැගෙන යෑමට උත්සාහ කළ ශ්‍රී ලාංකික මගියකු ගුවන් තොටුපළ රේගු නිලධාරීන් විසින් බණ්ඩාරනායක අන්තර්ජාතික ගුවන්තොටුපළේ දී අත්අඩංගුවට ගෙන තිබේ.

මහනුවර පදිංචි ව්‍යාපාරිකයකු වන 57 හැවිරිදි සැකකරු අද (27 ) අලුයම 12.30ට පමණ ශ්‍රීලන්කන් ගුවන් සේවයේ UL-405 ගුවන් යානයෙන් තායිලන්තයේ බැංකොක් සිට පැමිණ තිබේ.

රේගු නිලධාරීන් පැවසුවේ එම පුද්ගලයා සජීවී විසිතුරු පැළ තම ගමන් මලුවල සඟවා, කඩදාසි කොළවල ඔතා, කිසිදු ප්‍රකාශයක් අවශ්‍ය නොවන පැමිණීමේ පර්යන්තයේ ‘හරිත නාලිකාව’ හරහා යෑමට උත්සාහ කර ඇති බවයි.

කෙසේවෙතත්, පරීක්ෂා කිරීමේදී, නිලධාරීන් පැළ හඳුනාගෙන විධිමත් පරීක්ෂණයක් ආරම්භ කර තිබේ.

සැකකරු ශාක රට තුළට ගෙන ඒම සඳහා වලංගු ආනයන බලපත්‍රයක් හෝ ශාක සෞඛ්‍ය ආරක්ෂණ සහතිකයක් ලබාගෙන නොමැති බව අනාවරණ වී ඇත.

රාජසන්තක කරන ලද පැළ පසුව කටුනායක ශාක නිරෝධායන ආයතනයට භාර දී තිබේ.

ඒ සඳහා පාරිසරික හෝ කෘෂිකාර්මික අවදානම් වළක්වා ගැනීම වෙනුවෙන් විනාශ කිරීම සඳහාය.