ත්‍රිරෝද රථයකින් රුපියල් ලක්ෂ 6කට අධික වටිනාකමකින් යුත් ‘අයිස්’ (ස්ඵටික මෙතම්ෆෙටමින්) මත්ද්‍රව්‍ය තොගයක් ප්‍රවාහනය කරමින් සිටියදී පිරිමියකු සහ කාන්තාවක් අත්අඩංගුවට ගෙන ඇති බව පොලිසිය පවසයි.

මත්ද්‍රව්‍ය ජාවාරමෙන් උපයාගත් බවට සැක කෙරෙන රුපියල් 137,000 ක මුදල් සමඟ ඔවුන් සතුව තිබී අයිස් ග්‍රෑම් 21.4 ක් පොලිසිය විසින් අත්අඩංගුවට ගෙන තිබේ.

පොලිසියට අනුව, අත්අඩංගුවට ගත් කාන්තාව හිටපු පාර්ලිමේන්තු මන්ත්‍රී භාරත ලක්ෂ්මන් ප්‍රේමචන්ද්‍ර ඝාතනය සම්බන්ධයෙන් බූස්ස බන්ධනාගාරයේ මරණ දඬුවම නියම වී සිටින කුප්‍රකට පාතාල නායකයකු සහ මත්ද්‍රව්‍ය ජාවාරම්කරුවකු වන දෙමටගොඩ චමින්දගේ ඥාතිවරියකි.

ලැබුණු තොරතුරක් මත, මාලිගාවත්තේ ලක්හිරු සෙවන මහල් නිවාස සංකීර්ණය ඉදිරිපිට නවතා තිබූ ත්‍රිරෝද රථය පරීක්ෂා කළ පොලිසිය එහිදී මත්ද්‍රව්‍ය සොයාගෙන ඇත.

ප්‍රශ්න කිරීමේදී සැකකරුවන් පවසා ඇත්තේ, මෙම මත්ද්‍රව්‍ය දෙමටගොඩ චමින්දගේ බවත් බොරැල්ලේ සිට ගෙන ආ බවත්ය.

අත්අඩංගුවට ගත් වයස අවුරුදු 35 සහ 48 ක් වන දෙදෙනා බොරැල්ලේ පදිංචිකරුවන් වේ.