රුපියල් මිලියන 15ක් පමණ වටිනා විස්කි සහ එනසාල් විශාල තොගයක් නීති විරෝධී ලෙස රැගෙන යෑමට උත්සාහ කරමින් සිටියදී ශ්‍රී ලාංකික මගීන් සිව්දෙනෙකු බණ්ඩාරනායක අන්තර්ජාතික ගුවන්තොටුපළේ රේගු නිලධාරීන් විසින් අද උදෑසන අත්අඩංගුවට ගෙන තිබේ.

කොළඹ සහ හැටන් ප්‍රදේශවල පදිංචිකරුවන් වන මෙම සැකකරුවන් ඉන්දියාවේ බැංගලෝර් සිට අලුයම 1:00ට ගොඩබස්වන ලද ඉන්ඩිගෝ ගුවන් යානයෙන් මෙරටට පැමිණ ඇත.

ගමන් මලු පරීක්ෂා කිරීමේදී රේගු නිලධාරීන් විසින් මෙම නීති විරෝධී භාණ්ඩ සොයා ගෙන තිබිණි.

ඒ අතර විස්කි බෝතල් 378ක් සහ එනසාල් කිලෝග්‍රෑම් 132ක් තිබී ඇත.

මෙම භාණ්ඩ විදේශීය ගුවන්තොටුපළක තීරුබදු රහිත සාප්පු සංකීර්ණයකින් මිලදී ගෙන ඇති බව වාර්තා වේ.

මෙම පුද්ගලයන් සිව්දෙනා රඳවාගෙන ඇති අතර, ගුවන්තොටුපළ රේගු අංශය විසින් වැඩිදුර පරීක්ෂණ සිදු කරනු ලැබේ.