ජ්‍යෙෂ්ඨ මහාධිකරණ විනිසුරුවරුන් වන ආචාර්ය ෆ්‍රෑන්ක් ගුණවර්ධන සහ ආදිත්‍ය කුමාර පටබැඳි අභියාචනාධිකරණයට පත් කිරීමේ නිර්දේශය ආණ්ඩුක්‍රම ව්‍යවස්ථා සභාව විසින් අනුමත කර ඇත.

අගවිනිසුරු මුර්දු ප්‍රනාන්දුගේ නිර්දේශය මත ජනාධිපති අනුර දිසානායක විසින් විනිසුරුවරුන් දෙදෙනාගේ නම් ව්‍යවස්ථා සභාව වෙත යොමු කර තිබිණි.

විනිසුරු ගුණවර්ධන 1998 දී මහේස්ත්‍රාත්වරයකු ලෙස අධිකරණ සේවයට සම්බන්ධ වූ අතර ආණ්ඩුක්‍රම ව්‍යවස්ථා නීතිය පිළිබඳ ආචාර්ය උපාධියක් ලබා ඇත.

විනිසුරු පටබැඳි 2000 දී මහේස්ත්‍රාත්වරයකු ලෙස පත් කරන ලද අතර කොළඹ විශ්ව විද්‍යාලයේ උපාධිධාරියෙකි.

කෙසේවෙතත්, සිකුරාදා සවස කථානායක ජගත් වික්‍රමරත්න යටතේ රැස්වූ ව්‍යවස්ථා සභා කමිටුව, වැඩබලන අභියාචනාධිකරණ සභාපති මොහොමඩ් තාහිර් ලෆාර් ශ්‍රේෂ්ඨාධිකරණ විනිසුරුවරයකු ලෙස පත් කිරීමට ජනාධිපති දිසානායක විසින් කරන ලද නිර්දේශය සළකා බලා නොමැත.

විනිසුරු ලෆාර්ගේ නාමයෝජනා සම්බන්ධයෙන් පැනනැඟුණු ගැටලුවක් හේතුවෙන් සහ ශ්‍රේෂ්ඨාධිකරණ ආසනයක් තවමත් හිස්ව නොමැති බැවින් ඔහුගේ නාමයෝජනා සළකා නොමැති බව ආරංචි මාර්ග සඳහන් කරයි.

කෙසේවෙතත්, ජූනි 17 වැනි දින ගාමිණී අමරසේකර විනිසුරුවරයා ශ්‍රේෂ්ඨාධිකරණ විනිසුරුවරුන්ගේ විශ්‍රාම යන වයසවන අවුරුදු 65 සම්පූර්ණ කිරීමෙන් පසු ශ්‍රේෂ්ඨාධිකරණ විනිසුරුවරයකු ලෙස විශ්‍රාම යෑමට නියමිතය.

දැනට විශ්‍රාම යෑමට පෙර නිවාඩු ලබා සිටින අභියාචනාධිකරණ සභාපති නිශ්ශංක බන්දුල කරුණාරත්න වයස අවුරුදු 63 සම්පූර්ණ කිරීමෙන් පසු හෙට (16) විශ්‍රාම යෑමට නියමිතය.

මේ අතර විනිසුරු ලෆාර් ජූනි 18 වැනි දින අවුරුදු 63 සම්පූර්ණ කිරීමෙන් පසු විශ්‍රාම යෑමට නියමිතය.

ලබන සතියේ කරුණාරත්න සහ ලෆාර් යන විනිසුරුවරුන්ගේ විශ්‍රාම යෑමත් සමඟ අභියාචනාධිකරණයේ පුරප්පාඩු දෙකක් ඇති වේ.

ජ්‍යෙෂ්ඨ අතිරේක සොලිසිටර් ජනරාල් රොහන්ත අබේසූරිය අභියාචනාධිකරණයේ ඊළඟ සභාපතිවරයා ලෙස නීතිපතිවරයා නිර්දේශ කර ඇත.

ජනාධිපතිවරයා විසින් නිර්දේශය ව්‍යවස්ථා සභාව වෙත යවා ඇත.