ඩෙංගු, චිකුන්ගුන්යා හෝ ඉන්ෆ්ලුවෙන්සා රෝග ලක්ෂණ පෙන්නුම් කරන දරුවන් පෙර පාසලට හෝ පාසලට යැවීමෙන් වළකින ලෙස සෞඛ්‍ය බලධාරීන් මාපියන්ගෙන් ඉල්ලා සිටින බව රිජ්වේ ආර්යා ළමා රෝහලේ ළමා රෝග විශේෂඥ වෛද්‍ය දීපාල් පෙරේරා පැවසීය.

අධික උණ, සන්ධි වේදනාව හෝ තෙහෙට්ටුව වැනි රෝග ලක්ෂණ පෙන්නුම් කරන දරුවන් සඳහා විවේකයේ සහ නිසි වෛද්‍ය ප්‍රතිකාරවල වැදගත්කම පිළිබඳ ඔහු අවධාරණය කළේය.

රෝගී දරුවන් පාසල් යැවීම ඔවුන්ගේ සෞඛ්‍යයට අවදානමක් ඇති කරනවා පමණක් නොව, අන් අයට ආසාදනය පැතිරීමේ අවස්ථා වැඩි කරන බව වෛද්‍ය පෙරේරා සඳහන් කළේය.

ආසාදිත දරුවන් සඳහා මදුරු දැල් භාවිත කිරීමෙන් තවදුරටත් මදුරුවන් දෂ්ට කිරීම්වලින් ආරක්ෂා කර ගත හැකි බවත්, ආසාදිත නොවන දරුවන් ආසාදනයන්ගෙන් වළක්වා ගැනීම සඳහා ආරක්ෂා කළ යුතු බවත් ඔහු පෙන්වාදුන්නේය.

ඩෙංගු රෝගය මගින් දරුණු තෙහෙට්ටුවක් සහ සංකූලතා ඇති කළ හැකි බවත්, එය මාරාන්තික ප්‍රතිඵලවලට හේතු විය හැකි බවත් ඔහු අවධාරණය කළේය.

කෙසේවෙතත්, මහරගම, කොට්ටාව සහ කොළඹ දිස්ත්‍රික්කයේ ප්‍රදේශවල වැඩි රෝගීන් සංඛ්‍යාවක් වාර්තා වන අතර, බස්නාහිර පළාතේ ඩෙංගු සහ චිකුන්ගුන්යා ආසාදන දෙකම සැළකිව යුතු ලෙස වැඩි වී තිබේ.