මීට පෙර සිදුකළ වන සත්ව සංගණනය සම්පූර්ණයෙන්ම නිවැරදි යැයි සැලකිය නොහැකි බැවින් තවත් සත්ත්ව සංගණනයක් සිදුකිරීමට රජය අපේක්ෂා කරන බව කෘෂිකර්ම අමාත්‍ය කේ.ඩී.ලාල්කාන්ත පවසයි.

ලෝකයේ බොහෝ රටවල් සත්ත්ව සංගණනය පැවැත්වීමෙන් පසු සත්ව කළමනාකරණ වැඩසටහන් ක්‍රියාත්මක කරන බව ද අමාත්‍යවරයා පෙන්වාදෙයි.

මහනුවර සංවර්ධන කමිටු රැස්වීමෙන් අනතුරුව ජනමාධ්‍ය වෙත අදහස් දක්වමින් ඔහු කියාසිටියේ ඕස්ට්‍රේලියාව වැනි රටවල් නිවැරදි සංගණනයකින් පසුව කැන්ගරුවන් පිළිබඳ සත්ව කළමනාකරණය සිදුකරන බවයි.

එහෙත් ශ්‍රී ලංකාව තුළ මින් පෙර සත්ත්ව සංගණනයක් සිදුකර නොමැති බවත් මෑතක දී සිදුකරන ලද සංගණනය ද සම්පූර්ණයෙන් නිවැරදි යැයි සැළකිය නොහැකි බව අමාත්‍යවරයා පවසයි.

සත්ත්ව සංගණනය අවසන් කිරීමෙන් පසු රිළවුන් වැනි සතුන් පිළිබඳ කළමනාකරණ වැඩපිළිවෙළක් ක්‍රියාත්මක කිරීමට රජය අපේක්ෂා කරන බවද ඔහු පෙන්වාදෙයි.