උතුරු කොළඹ වරාය ව්‍යාපෘතිය සහ බටහිර බහාලුම් පර්යන්තයේ II අදියර ක්‍රියාත්මක කරමින් කොළඹ වරාය පුළුල් කිරීම සඳහා ලබන මාසයේදී ලෝකයේ හොඳම නැව් සමාගම් දහයෙන් කැමැත්ත ප්‍රකාශ කිරීමේ ලිපි (EOI) කැඳවන බව රජය පවසයි.

ඒ සම්බන්ධයෙන් අදහස් දක්වමින් වරාය හා ගුවන් සේවා නියෝජ්‍ය අමාත්‍ය ජනිත කොඩිතුවක්කු ජනමධ්‍ය වෙත පවසා ඇත්තේ, බහාලුම් හැසිරවීම සඳහා හැකියාව සහිත පර්යන්ත සමාගම් පහක් සමඟින් කොළඹ වරාය දැනට ක්‍රියාත්මක වන බවයි.

කොළඹ වරාය සැබෑ අර්ථයෙන් සමුද්‍ර කේන්ද්‍රස්ථානයක් බවට පත්කිරීම සඳහා නව පර්යන්ත එකතු කිරීමත් සමඟ වරාය පුළුල් කිරීමට සැලසුම් කර ඇති බව හා උතුරු වරාය සංවර්ධනය කිරීමෙන් පසු කැලණි ගඟ ආසන්නයේම වරාය පුළුල් කරන බව ද නියෝජ්‍ය අමාත්‍යවරයා පෙන්වා දී තිබේ.

“වරායක් දියුණු කළ පසු අපට ව්‍යාපාර අවශ්‍යයි. එබැවින්, සංවර්ධනය සඳහා මූල්‍යාධාර සැපයීම සඳහා අපි ලෝකයේ හොඳම නැව් සමාගම් දහයෙන් කැමැත්ත ප්‍රකාශ කිරීමේ ලිපි ඉල්ලනවා. ඒක ලබන මාසේ කරනවා. එමෙන්ම පුළුල් කිරීමේ කටයුතු සඳහා දැනටමත් ශක්‍යතා අධ්‍යයනය සිදුකර තිබෙනවා. ” ඔහු පැවසීය.

එමෙන්ම හම්බන්තොට වරාය පිළිබඳ සිදුකළ විමසීමේදී නියෝජ්‍ය අමාත්‍යවරයා පවසා ඇත්තේ, එහි දියකඩනය තවත් මීටරයකින් ගැඹුරු කිරීමට කැණීම් කටයුතු සිදුවෙමින් පවතින බවයි.

බටහිර බහාලුම් පර්යන්තයේ හි I අදියර යටතේ දැන් සංවර්ධන කටයුතු මේවනවිට සිදුකෙරෙමින් පවතින අතර පළමු භාණ්ඩ ප්‍රවාහන නෞකාව 2025 පළමු කාර්තුවේදී එහි ළඟාවීමට නියමිතය.

එය ඉන්දියාවේ Adani Ports සහ Special Economic Zones Ltd මෙන්ම ශ්‍රී ලංකාවේ විශාලතම පෞද්ගලික සමාගම් සමූහය වන John Keells Holdings PLC විසින් ඒකාබද්ධව සංවර්ධනය කර ඇත.