පොලිස් දෙපාර්තමේන්තුව මගින් අලුතින් හඳුන්වා දී ඇති උසස්වීම් ක්‍රමවේදය තුළ අධිකරණ කටයුතු මෙහෙයවන පොලිස් නිලධාරීන්ට ලකුණු ලබාදීමේ නිසි ක්‍රමවේදයක් නොමැති වීම හේතුවෙන් තමන් දැඩි අසාධාරණයකට ලක්ව ඇති බව එම නිලධාරීහු පවසති.

අධිකරණ පද්ධතිය සහ නීතිඥවරුන් සමඟ කටයුතු කරමින් ජනතාවට අත්‍යවශ්‍ය සේවාවක් ඉටුකිරීමට තමන් බැඳී සිටින බව ඔවුහු පෙන්වා දෙති.

මෙම කාර්යභාරයට අධිකරණ පද්ධතිය සහ නීති වෘත්තිකයන් සමඟ කටයුතු කිරීම මෙන්ම, ජනතාව වෙත අත්‍යවශ්‍ය සේවාවක් සැපයීම ඇතුළත් වේ. පොලිස්පති චක්‍රලේඛ අංක 2194/2009 සහ අපරාධ චක්‍රලේඛ අංක 23/2009 ට අනුකූලව, දිවයින පුරා පිහිටි පොලිස් ස්ථානවල ‘නඩු පැවරීමේ ඒකක’ ස්ථාපිත කර ඇත. මෙම ඒකකවල ස්ථානාධිපතිවරයා වෙත, නඩු කටයුතු මෙහෙයවන ආකාරය සම්බන්ධයෙන් පූර්ණ බලතල සහ උපදෙස් ලබා දී තිබේ.

කෙසේ වෙතත්, මෙම ඒකක නිල වශයෙන් ගැසට් කර නොමැති බව පවසමින් ඇතැම් ජ්‍යෙෂ්ඨ නියෝජ්‍ය පොලිස්පතිවරුන් මෙම ස්ථානාධිපතිවරුන්ගේ සේවය ඇගයීමට ලක් කිරීම හෝ ලකුණු ලබා දීම ප්‍රතික්ෂේප කර ඇත.

මෙමගින් තමන්ට සිදුවන දැඩි අගතිය සැලකිල්ලට ගෙන, තම සේවා සාධනය ඇගයීමට ලක් කර ලකුණු ලබාදීමට අවශ්‍ය උපදෙස් වහාම නිකුත් කරන ලෙස එම නිලධාරීන් උසස් නිලධාරීන්ගෙන් ඉල්ලා සිටියි.

එමෙන්ම, නඩු කටයුතු මෙහෙයවන නිලධාරීන්ට ප්‍රශංසා හෝ පාරිතෝෂික ලබාදීමේ ක්‍රමවේදයක් සම්බන්ධයෙන් පොලිස් දෙපාර්තමේන්තුව මෙතෙක් කිසිදු චක්‍රලේඛයක් හෝ උපදෙසක් නිකුත් කර නොමැති බවත්, එම නිසා උසස්වීම් ලැබීමේදී තමන්ට දැඩි අසාධාරණයක් සිදුවන බවත් නිලධාරීහු වැඩිදුරටත් සඳහන් කරති.

මේ සම්බන්ධයෙන් කරුණු දක්වමින් පොලිස්පතිවරයා ඇතුළු ඉහළම නිලධාරීන් වෙත ඒකාබද්ධ සංදේශයක් භාරදීමට ද අධිකරණ කටයුතු භාර පොලිස් නිලධාරීන් තීරණය කර ඇත.