වනයේ සැරිසැරූ මෙරට තවත් දළ ඇතකු ඝාතනය කිරීමට වගකිවයුතු පුද්ගලයින්ට එරෙහිව වහාම පියවර ගන්නා ලෙස විපක්ෂ නායක සජිත් ප්‍රේමදාස රජයෙන් ඉල්ලා සිටියි.

මියගිය ඇතකුගේ ඡායාරූප කිහිපයක් ද සමඟින් සමාජ මාධ්‍ය සටහනක් තබමින් විපක්ෂ නායකවරයා සඳහන් කර ඇත්තේ, වනජීවී සංරක්ෂණ දෙපාර්තමේන්තුව වාර්තා කර ඇති මෙම සිදුවීම ඉතා භයානක මෙන්ම ඛේදනීය තත්ත්වයක් බවයි.

“තවත් දළ ඇතකු ඝාතනය කරලා. වනජීවී දෙපාර්තමේන්තුව වාර්තා කර ඇති පරිදි එය ඉතාමත්ම ඛේදනීය දසුනක්,” යනුවෙන් ඔහු එහි සඳහන් කර ඇත.

වන අලි ඝාතනය වැළැක්වීම සඳහා බලධාරීන් වහාම තීරණාත්මක පියවර ගත යුතු බව අවධාරණය කළ සජිත් ප්‍රේමදාස, මෙම විනාශයන් සිදුකරන ‘පරිසර ත්‍රස්තවාදීන්’ වහාම නීතිය හමුවට පමුණුවා ඔවුන්ට දිය හැකි උපරිම දඬුවම් ලබා දිය යුතු බව ද පැවසීය.

“මෙම විනාශය සහ අලෙවි කිරීම් වැළැක්වීම සඳහා අපි සැවොම එක්වෙමු,” යනුවෙන් ද විපක්ෂ නායකවරයා ඉල්ලා සිටියි.

මෑතකදී රට තුළ දැඩි කතාබහට ලක්වූ කාවන්තිස්ස නමැති දළ ඇතාගේ සෝචනීය මරණයත් සමඟ මෙරට දළ ඇතුන්ගේ ජීවිත පිළිබඳව දැඩි කනගාටුවක් සහ සංවේගයක් මතුව තිබූ අතර, ඒ අතරතුර මෙම නවතම සිදුවීම වාර්තා වී තිබේ.

කාවන්තිස්ස ඇතාගේ මරණය සම්බන්ධයෙන් විශේෂ පරීක්ෂණයක් පවත්වන ලෙසත්, වනජීවීන් සුරැකීම සඳහා විශේෂ සංරක්ෂණ වැඩසටහනක් ක්‍රියාත්මක කරන ලෙසත් සජිත් ප්‍රේමදාස මීට පෙර ද බලධාරීන්ගෙන් ඉල්ලා සිටියේය.

කෙසේ වෙතත්, වාර්තා වී ඇති මෙම නවතම දළ ඇතාගේ මරණය සිදුවූ ස්ථානය සහ ඊට හේතුවූ කරුණු මෙතෙක් ස්වාධීනව තහවුරු වී නොමැත.