අසුන් පටි (Seat belt) පැළඳීම ප්‍රතික්ෂේප කළ කුඩා දරුවකු නිසා කැනඩාවේ ගුවන් ගමනක් අවලංගු කිරීමට සිදුවීමේ පුවතක් වාර්තා වන අතර, මේ පිළිබඳව අන්තර්ජාතික මට්ටමින් දැඩි සංවාදයක් මතුව තිබේ.

කැනඩාවේ වික්ටෝරියා සිට ටොරොන්ටෝ දක්වා ගමන් කිරීමට නියමිතව තිබූ ‘පෝටර් එයාර්ලයින්ස්’ ගුවන් යානය තුළ මෙම සිදුවීම සිදුවී ඇත. ගුවන් යානය ගුවන්ගත වීමට සූදානම් වන අවස්ථාවේදී කුඩා දරුවකු අසුන් පටිය පැළඳීම ප්‍රතික්ෂේප කර ඇති අතර, මාපියන් සහ ගුවන් කාර්ය මණ්ඩලය දැරූ උත්සාහයන් අසාර්ථක වී තිබේ.

ආරක්ෂිත නොවන තත්ත්වයක් යටතේ ගුවන් යානය ගුවන්ගත කළ නොහැකි බැවින්, නියමුවා විසින් යානය නැවත පර්යන්තය වෙත ගෙන ගොස් අදාළ දරුවා සහ දෙමාපියන් බැස්සවීමට තීරණය කර ඇත. මෙම ප්‍රමාදය නිසා ධාවන පථය වසා දැමීමට සිදු වූ බැවින්, යානයේ සිටි සියලුම මගීන්ගේ ගමන් වාර පසුදින දක්වා කල්දැමීමට සිදුවිය.

මෙම සිදුවීමත් සමඟ මහජනතාව අතර මතවාද දෙකක් නිර්මාණය වී ඇත. ගුවන් ආරක්ෂක විශේෂඥයන් පෙන්වාදෙන්නේ ගුවන්ගත වන විට අසුන්පටි නොබැඳි දරුවකු අනතුරකට ලක්වීමේ දැඩි අවදානමක් පවතින බැවින් ගුවන් කාර්ය මණ්ඩලය ගත් තීරණය නිවැරදි බවයි. ඇතැම් පිරිස් මාපියන්ගේ අතපසුවීම් විවේචනය කරන අතර, තවත් පිරිසක් පවසන්නේ දරුවා අඩදබර නොකළ බවත් ගුවන් ගමනට තිබූ බිය නිසා මෙලෙස හැසිරුණු බවත්ය.

එක් දරුවකු නිසා මුළු ගුවන් ගමනම කල්දැමීම පිළිබඳව බොහෝදෙනා ප්‍රශ්න කර ඇති අතර, මීට පෙර 2012 සහ 2018 වසරවලදී ද ඇමෙරිකාවේ මෙවැනිම සිදුවීම් වාර්තා වූ විට අදාළ පවුල පමණක් යානයෙන් ඉවත් කිරීමට පියවර ගෙන තිබිණි.