මෙවර උත්සව සමයේදී මීටර් 350 ක් උසැති කොළඹ නෙළුම් කුළුණ අග්නිදිග ආසියාවේ විශාලතම නත්තල් ගස බවට පත්කිරීමේ නව යෝජනාවක් බස්නාහිර පළාත් ආණ්ඩුකාර හනීෆ් යූසුෆ් විසින් ඉදිරිපත් කර තිබේ.

PickMe සමාගමේ Colombo Connect ඩිජිටල් පද්ධතිය නෙළුම් කුළුණේදී එළිදැක්වීමේ උත්සවයට එක්වෙමින් ඔහු මෙම අදහස පළකළේය.

කොළඹ නගරයේ නත්තල් උත්සව සමයේ සංචාරක ආකර්ෂණය ඉහළ නැංවීමේ අරමුණින් මෙම යෝජනාව ඉදිරිපත් කර ඇති අතර, මෙය තවමත් රජයේ ස්ථිර තීරණයක් ලෙස තහවුරු කර නොමැත.

එමෙන්ම මේ සඳහා වැයවන පිරිවැය, කාලරාමුව හෝ නෙළුම් කුළුණ කළමනාකාරීත්වයේ ප්‍රතිචාරය පිළිබඳව මෙතෙක් අනාවරණය වී නොමැත.

මීට පෙර 2016 වසරේදී ගාලු මුවදොර පිටියේදී රුපියල් මිලියන 12 ක (ඇමෙරිකානු ඩොලර් 80,000) පෞද්ගලික පිරිවැයකින් ලොව උසම කෘත්‍රිම නත්තල් ගස නිර්මාණය කිරීමට දැරූ උත්සාහය මතක් කරදෙන මෙම නව යෝජනාව, නෙළුම් කුළුණේ දැනටමත් පවතින සක්‍රිය LED ආලෝක පද්ධතිය (LED lighting system) භාවිතයෙන් ක්‍රියාත්මක කිරීමට හැකි වුවහොත්, පසුගිය වර මෙන් අධික පිරිවැයක් දැරීමට හෝ ඉදිකිරීම් ප්‍රමාදයන්ට මුහුණදීමට සිදුනොවනු ඇත.

එහිදී වැඩිදුරටත් අදහස් දැක්වූ ආණ්ඩුකාරවරයා, සංචාරක ව්‍යාපාරය සහ දේශීය වාණිජ කටයුතු ප්‍රවර්ධනය කිරීම සඳහා කොළඹ නගරය උත්සව සිරියෙන් බබළවිය යුතු බව පැවසීය.

“මට ඕන මෙවර නත්තලට නෙළුම් කුළුණ අග්නිදිග ආසියාවේ ලොකුම නත්තල් ගස කරන්න. මෙවර නත්තල අග්නිදිග ආසියාවේ හොඳම නත්තලක් බවට පත් කිරීමට මම ජනාධිපතිවරයාට සහ අග්‍රාමාත්‍යවරියට පොරොන්දු වෙනවා” යැයි පැවසූ ඔහු, කොළඹ පිහිටි ව්‍යාපාර, හෝටල්, ආපනශාලා, වෙළඳසැල් සහ නිවාස අලංකාර කරමින් මෙම උත්සව සිරියට එක්වන ලෙස පෞද්ගලික අංශයෙන්ද ඉල්ලා සිටියේය.