පාර්ලිමේන්තු කාරක සභා රැස්වීමක් අතරතුර සිදු වූ හැසිරීම සම්බන්ධයෙන් ඉදිකිරීම් කර්මාන්ත සංවර්ධන අධිකාරියේ නිලධාරීන් දෙදෙනකු කණගාටුව පළකර සමාව අයැද සිටි බවත්, චරිත සහ වරප්‍රසාද පිළිබඳ කාරක සභාව විසින් අදාළ කරුණු සමාලෝචනය කිරීමෙන් පසු එම සමාව පිළිගත් බවත් රාජ්‍ය ව්‍යවසාය පිළිබඳ කාරක සභාව පවසයි.

ඉදිකිරීම් කර්මාන්ත සංවර්ධන අධිකාරියේ 2022 සහ 2023 වසර සඳහා වූ විගණනය කරන ලද වාර්ෂික වාර්තා සහ එහි වත්මන් කාර්ය සාධනය පරීක්ෂා කිරීම සඳහා 2025 ඔක්තෝබර් 8 වැනි දින පවත්වන ලද රැස්වීමකදී එම අධිකාරියේ අධ්‍යක්ෂ මණ්ඩල සාමාජිකයන් දෙදෙනෙකුගේ හැසිරීම සම්බන්ධයෙන් ගැටලුකාරී තත්ත්වයක් මතුව තිබූ බව රාජ්‍ය ව්‍යවසාය පිළිබඳ කාරක සභාව නිවේදනයක් නිකුත් කරමින් සඳහන් කරයි.

රාජ්‍ය ව්‍යවසාය පිළිබඳ කාරක සභාවට අනුව, එක් නිලධාරියකු පාර්ලිමේන්තු කාරක සභා හමුවේ පෙනීසිටීම සඳහා නියමිත ඇඳුම් පැළඳුම් පටිපාටියට අනුකූල නොවන අයුරින් රැස්වීමට සහභාගී වී ඇත. එමෙන්ම, එම නිලධාරීන් දෙදෙනාම සභාපතිවරයාගේ පූර්ව අවසරයකින් තොරව කාරක සභා කටයුතු අතරතුර පිටව ගොස් ඇති බව ද කාරක සභාව නිරීක්ෂණය කර ඇත.

රාජ්‍ය ව්‍යවසාය පිළිබඳ කාරක සභා සභාපතිවරයා විසින් මතුකරන ලද වරප්‍රසාද ප්‍රශ්නයකට අනුව, පාර්ලිමේන්තුවට අපහාස කිරීමේ චෝදනා සම්බන්ධයෙන් මෙම නිලධාරීන් දෙදෙනා 2026 පෙබරවාරි 17 වන දින චරිත සහ වරප්‍රසාද පිළිබඳ කාරක සභාව හමුවේ පෙනීසිට ඇත.

එහිදී අදාළ නිලධාරීන් තම ක්‍රියාකලාපයේ බරපතලකම පිළිගනිමින් සිය අවංක කණගාටුව පළකර සමාව අයැද සිටි බව රාජ්‍ය ව්‍යවසාය පිළිබඳ කාරක සභාව පවසයි.

පාර්ලිමේන්තු කාරක සභාවල බලය, ගෞරවය සහ පටිපාටීන්ට ගරුකිරීමේ වැදගත්කම මෙම නිලධාරීන් තේරුම් ගෙන ඇති බව නිරීක්ෂණය කරමින්, රාජ්‍ය ව්‍යවසාය පිළිබඳ කාරක සභා සභාපතිවරයා සහ චරිත සහ වරප්‍රසාද පිළිබඳ කාරක සභාව විසින් පසුව එම සමාව අයැදීම පිළිගෙන ඇත.

පාර්ලිමේන්තු කාරක සභා හමුවේ පෙනීසිටින සියලුම පුද්ගලයන් සෑම විටම ඉහළම මට්ටමේ විනයක් පවත්වා ගැනීමටත්, පාර්ලිමේන්තු පටිපාටීන්ට අනුකූලව කටයුතු කිරීමටත් අපේක්ෂා කරන බව COPE කාරක සභාව වැඩිදුරටත් අවධාරණය කරයි.