මේ වසරේ මුල් භාගයේදී ඉතිහාසයේ පෙර නොවූ විරූ ලෙස ඉහළ ගිය රන් මිල, මේ වන විට වේගයෙන් පහත වැටෙමින් පවතින බව මූල්‍ය වෙළෙඳපොළ වාර්තා පවසයි. ඉන්දීය Multi Commodity Exchange (MCX) හි රන් ග්‍රෑම් 10ක මිල රුපියල් 1,92,991ක් වැනි වාර්තාගත ඉහළම අගයකට පත්වීමෙන් පසු, මේ වන විට එය රුපියල් 1,43,610 දක්වා සියයට 26කින් පමණ පහත වැටී ඇත. මේ හේතුවෙන් රන් මිලෙන් රුපියල් 49,400ක පමණ දැවැන්ත අගයක් ක්ෂය වී තිබීම ආයෝජකයන් මෙන්ම ස්වර්ණාභරණ මිලදී ගන්නන් ද දැඩි අවධානයකට ලක්කර තිබේ.

මෙලෙස මිල පහත වැටීමට ප්‍රධානතම හේතු මෙන්න

ගෝලීය ආර්ථික අවපාතය සහ බටහිර ආසියාවේ යුද අර්බුද හේතුවෙන් රන් මිල ඉහළ ගියද, වත්මන් මිල පහත වැටීමට ප්‍රධානතම හේතුව වී ඇත්තේ ඇමරිකානු ෆෙඩරල් සංචිතයේ පොලී අනුපාත ප්‍රතිපත්තියයි. ඇමරිකාවේ උද්ධමනය පාලනය කිරීම සඳහා පොලී අනුපාත තවදුරටත් ඉහළ මට්ටමක පවත්වා ගැනීමට තීරණය කර ඇති අතර, මේ වසර තුළ තවත් තුන් වතාවක් පොලී අනුපාත ඉහළ දැමීමට ඉඩ ඇති බව වෙළෙඳපොළ විශ්ලේෂකයෝ පවසති.

පොලී අනුපාත ඉහළ යන විට ආයෝජකයන් කිසිදු ස්ථාවර ආදායමක් ලබානොදෙන රන් ආයෝජනවලින් ඉවත් වී, පොලී ලැබෙන බැඳුම්කර වැනි වත්කම් වෙත යොමුවීම සාමාන්‍ය ස්වභාවයකි. මීට අමතරව ඇමරිකානු ඩොලරය ශක්තිමත් වීම හේතුවෙන් අන්තර්ජාතික වෙළෙඳපොළේ සෙසු රටවලට රන් මිලදී ගැනීම තවදුරටත් මිල අධික වී ඇත.

භූදේශපාලනික බලපෑම සහ අනාගත අනාවැකි

ඇමරිකාව සහ ඉරානය අතර සති අන්තයේ ඇති වූ යුදමය උණුසුම හේතුවෙන් බොරතෙල් මිල තාවකාලිකව ඉහළ ගියද, දෙරට අතර රාජ්‍යතාන්ත්‍රික සාකච්ඡා බලාපොරොත්තු සහගත මට්ටමක පැවතීම නිසා රන් සඳහා වූ ඉල්ලුම සීමාවිය. එසේම බොරතෙල් මිල ඉහළ යෑම නිසා උද්ධමනය තවත් වැඩිවිය හැකි බැවින්, ෆෙඩරල් බැංකුව පොලී අනුපාත දිගටම ඉහළ මට්ටමක තබනු ඇතැයි ආයෝජකයෝ බියවෙති.

මූල්‍ය විශ්ලේෂණ ආයතනයක් වන Augmont හි පර්යේෂණ ප්‍රධානී ආචාර්ය රෙනීෂා චයිනානි සඳහන් කරන්නේ, 2026 ජනවාරි මාසයේ පැවති උපරිම මිලට සාපේක්ෂව ජාත්‍යන්තර රන් මිල සියයට 30කට ආසන්න අගයකින් පහත වැටී ඇති බවයි. ඉදිරි දිනවලදී නිකුත් වීමට නියමිත ඇමරිකානු රැකියා නියුක්ති වාර්තා සහ නිෂ්පාදන දර්ශක මත රන් මිලෙහි ඉදිරි ගමන තීරණය වනු ඇත. ලෝක වෙළෙඳපොළේ රන් අවුන්සයක මිල ඩොලර් 4,000 සීමාවෙන් පහතට වැටුණහොත් එය තවත් ඩොලර් 3,600 දක්වා අඩු විය හැකි බවත්, තත්ත්වය යහපත් වුවහොත් වසර අගදී ඩොලර් 5,000 සීමාවට නැවත ළඟාවිය හැකි බවත් විශේෂඥයෝ පෙන්වාදෙති.

කෙසේවෙතත්, මිල ගණන් මෙලෙස රුපියල් 50,000කින් පමණ අඩු වීම ස්වර්ණාභරණ මිලදී ගන්නා සාමාන්‍ය ජනතාවට විශාල සහනයක් වී තිබේ.