මත්තල රාජපක්ෂ අන්තර්ජාතික ගුවන් තොටුපළ හවුල් ව්‍යාපාරයක් ලෙස පවත්වාගෙන යෑම සඳහා සුදුසු සහකරුවෙකු සොයා ගැනීමට රජය දියත් කළ සැලසුමට පාර්ශවයන් 35ත් 40ත් අතර ප්‍රමාණයක් කැමැත්ත පළ කර ඇති බව ‘ද ඩේලි මෝනිං’ පුවත්පත වාර්තා කරයි.

මේ සම්බන්ධයෙන් ඊයේ (28 වැනිදා) එම පුවත්පත වෙත අදහස් දක්වමින් සිවිල් ගුවන් සේවා නියෝජ්‍ය අමාත්‍ය ජනිත රුවන් කොඩිතුවක්කු ප්‍රකාශ කර ඇත්තේ, පෙර රජය සමයේ ක්‍රියාත්මක වූ කැමැත්ත ප්‍රකාශ කිරීමේ (EOI) ක්‍රියාවලියට සාපේක්ෂව මෙවර විභව්‍ය ආයෝජකයන්ගෙන් ලැබී ඇති ප්‍රතිචාරය ඉහළ මට්ටමක පවතින බවයි. නිල යෝජනා ඉදිරිපත් කිරීමෙන් අනතුරුව මේ සඳහා ඉදිරිපත් වන නිශ්චිත පාර්ශවයන් සංඛ්‍යාව දැනගත හැකි වනු ඇත.

“පසුගිය මාස කිහිපය තුළ පැවැත්වුණු පූර්ව සාකච්ඡා සඳහා පාර්ශව 35ත් 40ත් අතර ප්‍රමාණයක් සහභාගී වුණා. පසුගිය රජය යටතේ පැවති කැමැත්ත ප්‍රකාශ කිරීමේ ක්‍රියාවලියේදී ඉදිරිපත් වුණේ පාර්ශව එකක් හෝ දෙකක් පමණයි. නමුත් මෙවර 40කට ආසන්න පිරිසක් උනන්දුවක් දක්වා තිබෙනවා. යෝජනා භාරගැනීමේ අවසන් දිනය තවමත් අවසන් වී නොමැති බැවින්, නිල යෝජනා ලැබුණු පසු නිශ්චිත සංඛ්‍යාව ස්ථිර කරගත හැකියි,” යැයි නියෝජ්‍ය අමාත්‍යවරයා පවසා තිබේ.

පසුගිය වසර තුළ මත්තල ගුවන් තොටුපොළ විශාල පරිවර්තනයකට ලක්කර ඇති බැවින්, එය විභව්‍ය ආයෝජකයන් ආකර්ෂණය කරගැනීමට සමත් වී ඇති බව ද අමාත්‍යවරයා පෙන්වාදී ඇත.

“අප ධුරය භාරගන්නා විට මත්තල ගුවන් තොටුපළ කැලෑවකට සමානව පැවතුණා. අලි වැටවල් කැඩී බිඳී ගොස් වන සතුන් ගුවන් තොටුපළ පරිශ්‍රය තුළ සැරිසැරූ බැවින් ගුවන් ගමන් මෙහෙයුම් ආරක්ෂිතව සිදු කිරීමට නොහැකි තත්ත්වයක් තිබුණා. නමුත් පසුගිය වසර තුළ අප අවශ්‍ය ප්‍රතිසංස්කරණ කටයුතු නිම කර, වනජීවී කාර්යාලයක් ද පිහිටුවා, ගුවන් තොටුපළ වනජීවී අවදානමෙන් තොර බවට වන සහතිකය ද ලබාගත්තා. දැන් එය සම්පූර්ණයෙන්ම ක්‍රියාත්මක විය හැකි ගුවන් තොටුපළක් බවට පරිවර්තනය කර තිබෙනවා,” යැයි ඔහු පවසයි.

ගුවන් තොටුපළ ලාභදායී මට්ටමකට ගෙන ඒම සඳහා හවුල් ව්‍යාපාරිකයෙකු සොයාගැනීමේ අරමුණින් රජය මෙ වසර මුලදී කැමැත්ත ප්‍රකාශ කිරීමේ යෝජනා (EOIs) කැඳවනු ලැබීය.

මත්තල ගුවන් තොටුපළ ආරම්භයේ සිටම බලාපොරොත්තු වූ ප්‍රතිලාභ ජනනය කිරීමට අපොහොසත් වූ බවත්, එහි මෙහෙයුම් පිරිවැයට සමානව වාර්ෂිකව රුපියල් බිලියන 3ක පමණ පාඩුවක් ලබමින් තිබූ බවත් නියෝජ්‍ය අමාත්‍යවරයා මීට පෙර සඳහන් කර තිබිණි.

ගුවන් තොටුපොළ ආරක්ෂිත මෙහෙයුම් සඳහා සුදුසු මට්ටමකට පත්කිරීමෙන් පසු, රජයේ මීළඟ අවධානය යොමුව ඇත්තේ එය වාණිජමය වශයෙන් ශක්‍යතාවක් සහිත ස්ථානයක් බවට පත් කිරීම කෙරෙහිය.

මත්තල ගුවන් තොටුපළට වසරකට මගීන් මිලියනයක් පමණ හැසිරවීමේ ධාරිතාවයක් පැවතුණ ද, එහි ඉහළම මගී පිරිවැටුම වාර්තා වූයේ 2025 වසරේදී වන අතර, එම වසරේදී මගීන් 150,000ක් පමණ ගුවන් තොටුපළ පරිශ්‍රය භාවිත කර තිබිණි.

කටුනායක බණ්ඩාරනායක අන්තර්ජාතික ගුවන් තොටුපළේ තදබදය අවම කිරීම සහ කලාපීය සංවර්ධනය ප්‍රවර්ධනය කිරීම අරමුණු කරගනිමින් හම්බන්තොට ඉදිකරන ලද මත්තල ගුවන් තොටුපළ, එහි අවම භාවිතය සහ අධික නඩත්තු පිරිවැය හේතුවෙන් දීර්ඝ කාලයක සිට දැඩි කතාබහට ලක්වූ මාතෘකාවක් වී තිබේ.