විරෝධතා නොතකා ශ්‍රේෂ්ඨාධිකරණයේ සහ අභියාචනාධිකරණයේ විනිසුරුවරුන්ගේ විශ්‍රාම යාමේ වයස තවත් වසර දෙකකින් දීර්ඝ කිරීම පිළිබඳව රජය අඛණ්ඩව සලකා බලමින් සිටින බව ‘සන්ඩේ ටයිම්ස්’ පුවත්පත වාර්තා කරයි.

එම වාර්තාවට අනුව, පළපුරුදු විනිසුරුවරුන් වැඩි කාලයක් සේවයේ රඳවා තබාගැනීම සහතික කිරීම සඳහා රජය මෙම පියවර ගෙන ඇත. කෙසේවෙතත්, රජය අධිකරණයට බලපෑම් කිරීමට උත්සාහ කරන බවට විපක්ෂය සහ ජාත්‍යන්තර නීති සංගම් චෝදනා කරන පසුබිමක මෙම තීරණය කරළියට පැමිණ තිබේ.

අධිකරණ ක්ෂේත්‍රයේ පවතින පුරප්පාඩු පිරවීම සඳහා රජය විසින් යෝජනා කරන ලද පහළ සිට ඉහළට යන (bottom-up) ක්‍රමවේදය යටතේ, පහළ උසාවිවල පවතින පුරප්පාඩු පිරවීම සඳහා නව මහේස්ත්‍රාත්වරුන් 50 දෙනෙකු ද පත් කිරීමට නියමිත බව රජයේ ජ්‍යෙෂ්ඨ ප්‍රකාශකයකු පවසා ඇත.

මෙම යෝජනාවට අනුව, දැනට 65 වැනි වියේ පසුවන ශ්‍රේෂ්ඨාධිකරණ විනිසුරුවරුන්ගේ විශ්‍රාම වයස අවුරුදු 67 දක්වා ද, දැනට 63 වැනි වියේ පසුවන අභියාචනාධිකරණ විනිසුරුවරුන්ගේ විශ්‍රාම වයස අවුරුදු 65 දක්වා ද දීර්ඝ කිරීමට නියමිතය. වත්මන් ක්‍රමවේදයට අනුව මහාධිකරණ විනිසුරුවරුන් අවුරුදු 61න් ද, දිසා විනිසුරුවරුන් සහ මහේස්ත්‍රාත්වරුන් අවුරුදු 60න් ද විශ්‍රාම යති.

“අභියාචනාධිකරණයේ සහ මහාධිකරණවල ඉතා පළපුරුදු විනිසුරුවරුන් රැසක් සිටිනවා. ඔවුන්ට ඉහළ උසාවිවලට උසස්වීම් ලැබීමට සුදුසුකම් ලබන විට, ඔවුන් විශ්‍රාම වයසට පැමිණීම හෝ විශ්‍රාම යාමට ආසන්න වී තිබීම නිසා ඔවුන්ට ඉහළ උසාවිවල සේවය කිරීමට තිබෙන අවස්ථාව මඟහැරෙනවා. යෝජිත සංශෝධන සමඟින් ඔවුන්ට අවම වශයෙන් වසර දෙකක් හෝ තුනක් ඉහළ උසාවියේ සේවය කිරීමට අවස්ථාව ලැබෙනවා. වෘත්තීය අධිකරණ නිලධාරීන් ලෙස ඔවුන් සතු අත්දැකීම් සමස්ත පද්ධතියටම විශාල ප්‍රතිලාභයක් වේවි,” යැයි එම ප්‍රකාශකයා වැඩිදුරටත් සඳහන් කර තිබේ.

මුලින්ම නව මහේස්ත්‍රාත්වරුන් 50 දෙනකු පත්කර පහළ උසාවිවල පුරප්පාඩු පිරවීමටත්, ඉන් අනතුරුව ඉහළ උසාවිවල පවතින පුරප්පාඩු පිරවීමටත් කටයුතු කරන බව ද එම ආරංචි මාර්ග පවසයි.

මේ වන විට ශ්‍රේෂ්ඨාධිකරණයේ සහ අභියාචනාධිකරණයේ පුරප්පාඩු හතර බැගින් පවතී.

කෙසේවෙතත්, ශ්‍රී ලංකා නීතිඥ සංගමය, පොදුරාජ්‍ය මණ්ඩලීය නීතිඥ සංගමය සහ ආසියා සහ ශාන්තිකර කලාපීය නීති සංගමය ඇතුළු සංවිධාන රැසක්, මෙලෙස ඉහළ අධිකරණවල විනිසුරුවරුන්ගේ විශ්‍රාම වයස ඉහළ නැංවීමෙන් වළකින ලෙස රජයෙන් ඉල්ලා ඇත.