මඩකළපුව මහනගර සභාවේ මහජන පුස්තකාල නව ගොඩනැගිල්ල ජනාධිපති අනුර කුමාර දිසානායකගේ සහභාගිත්වයෙන්, හිටපු පාර්ලිමේන්තු මන්ත්‍රී එම්.ඒ. සුමන්තිරන් අතින් අද (20) පෙරවරුවේ විවෘත කෙරිණි.

අතරමග නතර වී තිබූ මෙම පුස්තකාලයේ ඉදිකිරීම් කටයුතු සාර්ථක ලෙස අවසන් වනු දැකීම සතුටක් බව එහිදී ජනාධිපති අනුර කුමාර දිසානායක සඳහන් කළේය.

මෙම අවස්ථාවට සමගාමීව මහජන පුස්තකාලයේ නිල වෙබ් අඩවිය දියත් කිරිමද ජනාධිපතිවරයා අතින් සිදු විය.

මෙම නව පුස්තකාල ගොඩනැගිල්ල තුළ ළමුන් වෙනුවෙන් විද්‍යා සහ තාක්ෂණික දැනුම ලබා දීම සඳහා වෙනම ඒකකයක් ද ස්ථාපිත කර තිබේ.

රට තුළ කියවීමේ සංස්කෘතිය වියැකී යමින් තිබෙන අවධියක තවමත් දමිළ ජනතාව කියවීම සඳහා දක්වන උනන්දුව අගය කළ යුතු බව පැවසූ ජනාධිපතිවරයා, පුස්තකාලයක් විවෘත කිරීම යනු බන්ධනාගාරයක අවශ්‍යතාව නැති කරන්නක් බවද, මෙම මහජන පුස්තකාල නව ගොඩනැගිල්ල විවෘත කිරීමෙන් දමිළ ජනතාවගේ පොත් කියවීමේ සංස්කෘතිය ඉදිරියට පවත්වාගෙන යෑම දිරිමත් කරනු ඇති බවද පැවසීය.

මඩකළපුව මහජන පුස්තකාල නව ගොඩනැගිල්ලේ නිරීක්ෂණ චාරිකාවකට එක් වූ ජනාධිපතිවරයා, මහ නගර සභාවේ කාර්ය මණ්ඩලය සමඟ සුහද කතාබහකද නිරත විය.

එහිදී මඩකළපුව නගරාධිපති කේ. සිවම් පාක්‍කියනාදන් ජනාධිපතිවරයාට සමරු සිහිවටනයක්ද පිරිනැමීය.

මෙම අවස්ථාව සනිටුහන් කරමින් ජනාධිපතිවරයා විසින් පුස්තකාල භූමියේ පැළයක් රෝපණය කරන ලදී.