අඩු විදුලි ඉල්ලුම සහ ඉහළ සූර්ය උත්පාදනය මධ්‍යයේ ජාලක ස්ථායිතාව පිළිබඳ ඇතිවිය හැකි ගැටළු හේතුවෙන්, පසුගිය සිකුරාදා (අප්‍රේල් 10) සිට දින 10ක කාලයක් සඳහා මහා පරිමාණ වහල මත සූර්ය පද්ධති ස්ථාපනයන් තාවකාලිකව විසන්ධි කරන ලෙස ලංකා විදුලිබල මණ්ඩලය (CEB) එම සූර්ය පද්ධති හිමිකරුවන්ට උපදෙස් දී තිබේ.

කිලෝවොට් 300 ධාරිතාව ඉක්මවන වහල මත සූර්ය පද්ධති සඳහා මෙම නියෝගය අදාළ වේ.

එම පද්ධති අප්‍රේල් 20 වැනිදා දක්වා ක්‍රියා විරහිත කර තැබිය යුතුය.

දීර්ඝ නිවාඩු සමය සමඟ ජාතික විදුලි ඉල්ලුම සාමාන්‍යයෙන් පහත වැටෙන අතර, පවතින අව්ව සහිත කාලගුණික තත්ත්වයන් සමඟ සූර්ය නිෂ්පාදනය සැළකිව යුතු ලෙස වැඩි කරයි.

ජ්‍යෙෂ්ඨ විදුලි ඉංජිනේරුවන් පවසන්නේ, ජාතික විදුලිබල පද්ධතියට එල්ල වන මෙහෙයුම් අවදානම් හේතුවෙන් මෙම තීරණය අවශ්‍ය වූ බවයි.

“සැපයුම සහ ඉල්ලුම අතර කැපී පෙනෙන අසමතුලිතතාවක් අපට පෙනෙනවා. නිවාඩු කාලය තුළ කර්මාන්ත සහ වාණිජ ආයතන අඩු මට්ටම්වලින් ක්‍රියාත්මක වීමත් සමඟ ඉල්ලුම පහත වැටෙනවා. ඒ සමඟම, සූර්ය උත්පාදනය ඉහළ මට්ටමක පවතිනවා, ඒ නිසා ජාලයට අවශෝෂණය කර ගැනීමටඅපහසු අතිරික්ත බලයක් නිර්මාණය වෙනවා.” යනුවෙන් ජ්‍යෙෂ්ඨ පද්ධති පාලන ඉංජිනේරුවෙක් පවසා ඇත.

එවැනි අසමතුලිතතාවන් පද්ධති සංඛ්‍යාතයේ උච්චාවචනයන්ට හේතු විය හැකි බවත්, ජාලයේ ස්ථායිතාවට තර්ජනයක් විය හැකි බවත් ඔහු පැහැදිලි කළේය.

සම්ප්‍රේෂණ අංශයට සම්බන්ධ තවත් ජ්‍යෙෂ්ඨ ඉංජිනේරුවකු සඳහන් කළේ බෙදා හරින ලද සූර්ය බල උත්පාදනය කළමනාකරණය කිරීම තාක්ෂණික අභියෝගයක් ලෙස පවතින බවයි.

“සාම්ප්‍රදායික බලාගාර වගේ නෙවෙයි, වහල මත සූර්ය පද්ධති මධ්‍යම පද්ධතියකින් පාලනය වෙන්නේ නැහැ. අපට ඒවා තත්‍ය කාලීනව සෘජුවම පාලනය කළ නොහැකියි. අතිරික්ත උත්පාදන කාලවලදී පද්ධතිය සමතුලිත කිරීමට අපට ඇති හැකියාව මේ නිසා සීමා වෙනවා,” ඔහු පැවසීය.

රටේ ජාල යටිතල පහසුකම් තවමත් පුනර්ජනනීය බලශක්තියේ වේගවත් වර්ධනයට අනුවර්තනය වෙමින් පවතින බව ඔහු තවදුරටත් පැවසීය.

“මෙම උච්චාවචනයන් ඵලදායී ලෙස හැසිරවීමට සහ ගබඩා කිරීමට ප්‍රමාණවත් තරම් මහා පරිමාණ බැටරි සහ දියුණු ජාල කළමනාකරණ පද්ධති අප සතුව නැහැ. එවැනි හැකියාවන් වැඩි දියුණු කරන තුරු, තාවකාලික කප්පාදුවක් අවශ්‍ය වනවා.” යනුවෙන් ඔහු පැවසීය.

සූර්ය උත්පාදනයේ හදිසි ඉහළ යැමත් සමග සාම්ප්‍රදායික තාප බලාගාර හදිසියේ වසා දැමීමට හෝ සකස් කිරීමට නොහැකි බව ඉංජිනේරුවෝ පෙන්වා දුන්හ.

“මෙම බලාගාරවලට අවම ස්ථාවර මෙහෙයුම් මට්ටම් අවශ්‍යයි. අඩු ඉල්ලුමක් ඇති විට සූර්ය බලය ජාලයට එක්වන විට, එය කළමනාකරණය කිරීමට පහසු නොවන මෙහෙයුම් සීමාවන් නිර්මාණය කරනවා ,” එක් නිලධාරියෙක් පැවසීය.

මෙම පියවර හේතුවෙන් බලපෑමට ලක් වූ සූර්ය පද්ධති හිමියන්ගේ සහයෝගයට මණ්ඩලය කෘතඥතාව පළ කරන අතර, එය රට පුරා අඛණ්ඩ සහ ස්ථාවර විදුලි සැපයුමක් සහතික කිරීම අරමුණු කරගත් කෙටි කාලීන මැදිහත්වීමක් බව අවධාරණය කළේය.

බලශක්ති විශේෂඥයන් පවසන්නේ බැටරි බලශක්ති ගබඩා පද්ධති, ස්මාර්ට් ජාල තාක්ෂණයන් සහ ඉල්ලුම සඳහා වැඩිදියුණු කළ කළමනාකරණයට ආයෝජනය කිරීම ඇතුළුව ජාලක නවීකරණය සඳහා හදිසි අවශ්‍යතාවක් පවතින බවයි.