විදේශයන්හි සැඟවී සිටින සංවිධානාත්මක අපරාධකරුවන් 95 දෙනෙකුට එරෙහිව ශ්‍රී ලංකා පොලිසිය ඉන්ටර්පෝල් රතු නිවේදන ලබාගෙන තිබේ.

අද (16) පැවති මාධ්‍ය හමුවකදී අදහස් දක්වමින් පොලිස් මාධ්‍ය ප්‍රකාශක සහකාර පොලිස් අධිකාරී එෆ්.යූ. වූට්ලර් පැවසුවේ රතු නිවේදන හරහා 2024 දී සැකකරුවන් 10 දෙනෙකු සහ 2025 දී සැකකරුවන් 11 දෙනෙකු නැවත ශ්‍රී ලංකාවට රැගෙන ආ බවයි.

එම කාලය තුළම උදර්පණ පනත යටතේ සැකකරුවන් 21 දෙනෙකු රටට රැගෙන ආ බව ඔහු වැඩිදුරටත් පැවසීය.

“2024 දී රතු නිවේදන හරහා සැකකරුවන් 10 දෙනෙකු ආපසු රැගෙනවිත් තිබෙනවා. 2025 දී එම ගණන 11ක් . 2024 සහ 2025 අතර කාලය තුළ සැකකරුවන් 21 දෙනෙකු උදර්පණ පනත යටතේ ගෙනවිත් තිබෙනවා,” වූට්ලර් පැවසීය.

පොලිසියට අනුව, විදේශයන්හි සැඟවී සිටින සහ මාර්ගගත අපරාධවලට සම්බන්ධ බොහෝ අපරාධකරුවන් හඳුනාගෙන ඇති අතර, එමඟින් මේ දක්වා රතු නිවේදන 95ක් නිකුත් කර ඇත.

මෙම නිවේදන හේතුවෙන් සැකකරුවන් දෙදෙනෙකු සහ එක් සැකකාරියක් අද ශ්‍රී ලංකාවට ගෙන ආ බව ඔහු පැවසීය.