ඇල්ල ප්‍රදේශයට සංචාරකයන් රැගෙන පැමිණෙන කුලී රථ රියැදුරන්ට හා රථවලට පහරදීමේ සිද්ධිය සම්බන්ධයෙන් ඇල්ල පොලිසිය විසින් විමර්ශන සිදුකර අත්අඩංගුවට ගත් සැකකරුවන් තිදෙනකු බණ්ඩාරවෙල මහෙස්ත්‍රාත් අධිකරණයට ඉදිරිපත් කිරීමෙන් පසු ලබන 29 වැනිදා තෙක් රක්ෂිත බන්ධනාගාරගත කර ඇත.

ඇල්ල පොලිස් වසමේදී කුලී රථ රියදුරෙකුට පහරදීමට තැත්කර ඔහුගේ මෝටර් රථයට පහරදී අනර්ථයක් සිදුකිරීම සම්බන්ධයෙන් හා මෙම සේවාව සපයන රියැදුරු කාන්තාවකට පහරදී මුදල් කොල්ලකෑමේ සිද්ධියක් සම්බන්ධයෙන් විමර්ශනය කර මෙම සැකකරුවන් තිදෙනා අත්අඩංගුවට ගෙන තිබෙන බව පොලිස් මාධ්‍ය කොට්ඨාසය පවසයි.

ඒ අනුව මෝටර් රථයේ රියැදුරුට පහරදීමට තැත්කිරීම හා මෝටර් රථයට අනර්ථයක් සිදුකිරීම සම්බන්ධයෙන් සැකකරුවන් දෙදෙනකු ද අනෙක් මෝටර් රථයේ රියැදුරු කතකට පහරදී මුදල් කොල්ල කෑම සම්බන්ධයෙන් අත්අඩංගුවට ගත් මෙම සැකකරුවන් ලබන 29 වැනිදා තෙක් රක්ෂිත බන්ධනාගාරගත කර එදින හඳුනාගැනීමේ පෙරෙට්ටුවකට ඉදිරිපත් කරන ලෙසට මහෙස්ත්‍රාත්වරයා විසින් උපදෙස් දී ඇත.

කුලී රථ රියැදුරකුට බැණවැදුණු බව කියන ඇල්ල පොලිසියේ නිලධාරීන් දෙදෙනකු ද වෙනත් ස්ථානයකට මාරුකිරීමට ද පොලිසිය කටයුතු කර තිබේ.

කුලී රථ රියැදුරන්ට ඇල්ල ප්‍රදේශයේදී වන හිරිහැරවලට විරෝධය දැක්වීම සඳහා කුලී රථ රියදුරන් පිරිසක් සිය මෝටර් රථවලින් ඇල්ල ප්‍රදේශයට ගොස් සිටි බවටද වාර්තා විය.