දෙසැම්බර් 22 වැනි දින කොළඹ මහනගර සභාව විසින් ඉදිරිපත් කරන ලද අයවැය මූලික ඡන්ද විමසීමේදී පරාජයට පත්වූයේ එහි අන්තර්ගතයට වඩා දේශපාලන හේතූන් මත බව කොළඹ නගරාධිපති ව්‍රායි කැලි බල්තසාර් පවසයි.

ඡන්දයෙන් පසුව නිකුත් කළ නිවේදනයක ඇය පවසන්නේ, යෝජිත අයවැය කොළඹ පදිංචිකරුවන්ගේ ප්‍රධාන අවශ්‍යතා සපුරාලීම අරමුණු කරගත් ශක්තිමත්, ජනතාව කේන්ද්‍ර කරගත් මූල්‍ය සැලැස්මක් බවයි.

කොළඹ මහනගර සභාව තුළ විපක්ෂ නියෝජිතයන් සමඟ සාකච්ඡා ඇතුළත් පුළුල් උපදේශන සහ සහභාගීත්ව ක්‍රියාවලියක් හරහා අයවැය සකස් කර ඇති බව ඇය සඳහන් කරයි.

කෙසේවෙතත්, ඉදිරියට යාමට අවශ්‍ය ඡන්ද සංඛ්‍යාව ලබාගැනීමට යෝජනාව අසමත් වූ බව නගරාධිපතිනිය සඳහන් කළ අතර, එම ප්‍රතිඵලය අයවැයේ අන්තර්ගතය ප්‍රතික්ෂේප කිරීමක් නොව දේශපාලනික කාරණයක් බව නගරාධිපතිනිය පෙන්වාදෙයි.

පසුබෑමක් තිබියදීත්, අයවැය ක්‍රියාවලිය දැන් දෙවැනිවර කියවීමකට යන බවත්, අවශ්‍ය නම් සංශෝධන තවමත් යෝජනා කළ හැකි බවත් නගරාධිපතිනිය පවසයි.

නගරාධිපතිනිය ලෙස ඇයගේ වරම නොවෙනස්ව පවතින බව ඇය තවදුරටත් අවධාරණය කළාය.

සැලසුම් කළ සංවර්ධන සහ සේවා වැඩසටහන් නියමිත පරිදි ඉදිරියට ගෙනයෑමට ඉඩ සලසමින් අයවැය සති දෙකක් ඇතුළත නැවත ඉදිරිපත් කිරීමට අපේක්ෂා කරන බව නගරාධිපතිනිය ප්‍රකාශ කරයි.

පවතින නීතිය යටතේ, නගර සභා අයවැයක් පරාජයට පත් වුවද, නගරාධිපතිවරයෙකුට වසර දෙකක් දක්වා ධුරයේ රැඳී සිටීමට අවසර ඇත.