පසුගිය දිනවල ඇද හැලුණු අධික වර්ෂාව හේතුවෙන් පුත්තලම දිස්ත්‍රික්කයේ ලුණු ලේවායන්වල ගබඩා කර තිබූ ලුණු මෙට්‍රික් ටොන් 25,000කට වැඩි ප්‍රමාණයක් විනාශ වී ඇති බව ශ්‍රී ලංකා ලුණු නිෂ්පාදකයන්ගේ සංගමයේ සභාපති රනිෂ් බදුර්දීන් පැවසීය.

මාධ්‍ය වෙත අදහස් දක්වමින් බදුර්දීන් පැවසුවේ, තම සංගමයට අයත් ලුණු ලේවායන්වල ගබඩා කර තිබූ ලුණු මෙට්‍රික් ටොන් 10,000කට අධික ප්‍රමාණයක් ගංවතුර නිසා හානි වී ඇති බවයි.

පුත්තලම, වනාතවිල්ලුව, මුන්දලම සහ කල්පිටිය යන ප්‍රදේශවල පෞද්ගලික නිෂ්පාදකයන්ට අයත් ලුණු මෙට්‍රික් ටොන් 10,000ක් ද ගංවතුර හේතුවෙන් විනාශ වී ඇති බව ඔහු තවදුරටත් සඳහන් කළේය.

ඊට අමතරව, පුත්තලම ලුණු සමාගම සහ තවත් ප්‍රධාන ව්‍යාපාරික ආයතන කිහිපයක් විසින් ගබඩා කර තිබූ ලුණු මෙට්‍රික් ටොන් 5,000කට අධික ප්‍රමාණයක් ද විනාශ වී ඇති බව ඔහු පැවසීය.

මෙම ව්‍යසනය දිස්ත්‍රික්කයේ ලුණු කර්මාන්තයට දැඩි පසුබෑමක් ඇති කර ඇති අතර, මුළු පාඩුව රුපියල් බිලියන 12 ඉක්මවන බවට ගණන් බලා ඇත.

ලුණු ලේවායන් කිහිපයක යටිතල පහසුකම්වලට දැඩි ලෙස හානි වී ඇති බවත්, ඇතැම් මධ්‍යස්ථාන සම්පූර්ණයෙන් ප්‍රතිසංස්කරණය කළ යුතු බවත්, අභ්‍යන්තර මාර්ග ජාල ද සෝදා පාළුවට ගොස් ඇති බවත් ඔහු පැවසීය.

නිෂ්පාදනය නැවත ආරම්භ කිරීම සඳහා සැළකිව යුතු මූල්‍ය පිරිවැයක් අවශ්‍ය වනු ඇති බවත්, කර්මාන්තය පුනර්ජීවනය කිරීම සඳහා වහාම සහන සහ අවශ්‍ය ආධාර ලබා දෙන ලෙස රජයෙන් ඉල්ලා සිටින බවත් ඔහු පැවසීය.