December 19, 2025
රජය වන්දි ලබාදෙන බවට සහතික වී තිබියදීත්, අයහපත් කාලගුණික තත්ත්වයන්ගෙන් පීඩාවට පත් ජනතාවට මේ දක්වා කිසිදු වන්දි මුදලක් ලැබී නොමැති බව ශ්රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ චෝදනා කරයි
මාධ්ය අමතමින් රාජපක්ෂ පැවසුවේ, දිස්ත්රික් හා ප්රාදේශීය මට්ටම්වල නිලධාරීන්ට වන්දි ක්රියාපටිපාටි පිළිබඳ විධිමත් ලෙස ලිඛිතව දැනුම් දී නොමැති බවයි.
වන්දි සම්බන්ධයෙන් ජනාධිපතිවරයා පාර්ලිමේන්තුවේදී ඇතැම් ප්රකාශ සිදුකර තිබුණද, දිස්ත්රික් සංවර්ධන කමිටුවලට වෙනස් අදහසක් ඉදිරිපත්කර ඇති බව ඔහු කියා සිටියේය.
“මරණ සහතික දෙන්නත් දේශපාලන අධිකාරිය උත්සව තියන්න හදනවා කියලා අපට පේනවා. මේ උත්සව තියන්න කාලයක් නෙවෙයි. ජනතාවට අවශ්ය වන්නේ ඉඩම් ඔප්පු සහ ස්ථිර විසඳුම්,” රාජපක්ෂ පැවසීය.
වත්මන් රජය බලයට පත් වූයේ සැමරුම්වලට විරුද්ධ බව ප්රකාශ කරමින් වුවද ආරක්ෂිත ප්රදේශවලට නැවත පදිංචි කරවන ජනතාවට ඔප්පු බෙදා හැරීම සඳහා උත්සව පැවැත්වීම සම්බන්ධයෙන් කිසිදු ගැටළුවක් නොමැති බව ඔහු තවදුරටත් පැවසීය.
රාජපක්ෂ රජයෙන් ඉල්ලා සිටියේ වඩාත් ප්රායෝගික ප්රවේශයක් ගෙන බලපෑමට ලක් වූ ප්රජාවන් සමඟ සෘජුව සම්බන්ධ වන ලෙසයි.
“දැනට පවා, ජනතාවට තම ගැටළු ප්රකාශ කරන්න නිසි යාන්ත්රණයක් නැහැ. ඔවුන් තම ගැටළු බෙදාගන්නේ අපි ඔවුන් බලන්න ගියහම පමණයි,” ඔහු පැවසීය.
අයහපත් කාලගුණයෙන් දැඩි ලෙස පීඩාවට පත් වූවන්ට ප්රමාණවත් ලෙස සහාය වීමට රජය අපොහොසත් වී ඇති බව ඔහු තවදුරටත් කියා සිටියේය.
රාජපක්ෂට අනුව, බොහෝ අවතැන් වූ පවුල් තාවකාලික නවාතැන්වලින් තම නිවෙස් වෙත ආපසු යා හැක්කේ කවදාද යන්න පිළිබඳ අවිනිශ්චිතව සිටිති.
ඉවත් කිරීමේ අනතුරු ඇඟවීම් නිකුත්කර ඇති ගම්මාන කිහිපයකට නිලධාරීන් ගොස් නොමැති බව පවසමින්, ජාතික ගොඩනැගිලි පර්යේෂණ සංවිධානය විසින් බිම් මට්ටමේ තක්සේරු කිරීම් කර නොමැතිකම ද ඔහු විවේචනය කළේය.
“පාසල් නැවත විවෘත කරලා, නමුත් පවුල් අවතැන්ව සිටින නිසා දරුවන්ට ආපසු නිවෙස්වලට යෑමට නොහැකි වී තිබෙනවා,” ඔහු තවදුරටත් පැවසීය.
බලපෑමට ලක් වූ ප්රජාවගේ ගැටළු විසඳීමට සහ කාලෝචිත සහන සහ නැවත පදිංචි කිරීමේ පියවර සහතික කිරීමට කඩිනම් ක්රියාමාර්ග ගන්නා ලෙස නාමල් රාජපක්ෂ බලධාරීන්ගෙන් ඉල්ලා සිටියේය.
