දේශීය ආදායම් දෙපාර්තමේන්තුව නොවැම්බර් 17 වැනි දින වනවිට රුපියල් මිලියන 2,002,241ක් දක්වා තම ඉතිහාසයේ ඉහළම බදු ආදායම් එකතු කිරීම අත්කර ගෙන ඇති බව නිවේදනය කර ඇත.

නොවැම්බර් 18 වැනි දින නිකුත් කරන ලද නිල ප්‍රකාශයකට අනුව, 2025 දී මේ දක්වා රැස්කරන ලද ආදායම 2024 දී වාර්තා වූ මුළු ආදායමට සාපේක්ෂව රුපියල් මිලියන 60,079 ක වැඩිවීමක් පෙන්නුම් කරයි.

2024 සමස්ත වර්ෂය තුළදී දේශීය ආදායම් දෙපාර්තමේන්තුව රැස්කර තිබූ ආදායම රුපියල් මිලියන 1,942,162 කි.

2025 මුල් මාස එකොළහ තුළ රුපියල් ට්‍රිලියන 2 සීමාව ඉක්මවා යෑම රජයේ මූල්‍ය තත්ත්වය ශක්තිමත් කිරීම සඳහා සැලකිය යුතු දායකත්වයක් පිළිබිඹු කරන බව දේශීය ආදායම් දෙපාර්තමේන්තුව පැවසීය.

බදු නීතිවලට අනුකූලව තම වගකීම් ඉටු කිරීම වෙනුවෙන් දේශීය ආදායම් කොමසාරිස් ජනරාල් රුක්දේවි පී. එච්. ප්‍රනාන්දු, බදු ගෙවන්නන්ට සිය කෘතඥතාව පළකළ අතර, ඔවුන්ගේ සහයෝගීතාවය ජාතික ප්‍රගතියට සහ මහජන සුභසාධනයට සහාය වී ඇති බව සඳහන් කරයි.