November 17, 2025
ත්රිකුණාමලයේ බුද්ධ ප්රතිමාවක් පිළිබඳ මෑත කාලීන ගැටලුව සම්බන්ධයෙන් රජයේ ප්රතිචාරයට එරෙහිව ඉලංකෙයි තමිල් අරසු පක්ෂය අදහස් පළකර ඇති අතර, ත්රිකුණාමල පාර්ලිමේන්තු මන්ත්රී සහ නියෝජ්ය විදේශ අමාත්ය අරුන් හේමචන්ද්ර ඇතුළු ජාතික ජනතා බලවේගයේ සියලුම දෙමළ සාමාජිකයන්ගෙන් වහාම ඉල්ලා අස්වන ලෙස ඉල්ලා තිබේ.
ඊයේ රාත්රියේ ප්රදේශයේ විහාරස්ථානයක බුදු පිළිමයක් තැබීමට පිරිසක් උත්සාහ කිරීමෙන් පසු නොසන්සුන්කාරී තත්වයක් වාර්තා විය. තත්වය පාලනය කිරීම සඳහා පොලිසිය යොදවා ඇති අතර, පසුව ප්රතිමාව එම ස්ථානයෙන් ඉවත් කරන ලදී.
අද පාර්ලිමේන්තුව අමතමින් මහජන ආරක්ෂක අමාත්ය ආනන්ද විජේපාල පැවසුවේ විනාශකාරී ක්රියාවක් සිදුවිය හැකි බවට ලැබුණු තොරතුරු හේතුවෙන් ප්රතිමාව ඉවත් කළ බවත්, අද එම පිළිමය නැවත තැබීමට පියවර ගෙන ඇති බවත්, එහි ආරක්ෂාව සඳහා විශේෂ පොලිස් ආරක්ෂාවක් ලබාදෙන බවත්ය.
අමාත්ය විජේපාලගේ ප්රකාශය පිළිබඳව අදහස් දක්වමින්, ඉලංකෙයි තමිල් අරසු පක්ෂයේ මහලේකම් එම්.ඒ. සුමන්තිරන් පවසන්නේ, රජය සහ මහජන ආරක්ෂක අමාත්ය ආනන්ද විජේපාල බහුතර බලවේගවල අනවශ්ය බලපෑම්වලට යටත් වී ඇති බවයි.
“ඊයේ රාත්රියේ, අමාත්යවරයාගේ නියෝගය මත පොලිසිය ත්රිකුණාමලය වෙරළ තීරයේ නීතිවිරෝධී ලෙස ස්ථාපනය කරන ලද පිළිමය ඉවත් කළ විට, සමහරු සිතුවේ රජය කිසිදු ජාතිවාදී මානසිකත්වයකින් තොරව නිසි ලෙස ක්රියාකරන බවයි. අහෝ! මෙම රජයේ පාද මැටිවලින් සාදා ඇති බව අමාත්යවරයා පාර්ලිමේන්තුවේදී පෙන්නුම් කළ බැවින් එය කෙටි කාලීන විය,” යැයි හිටපු මන්ත්රී සුමන්තිරන් ‘X’ පණිවිඩයක් නිකුත්කරමින් සඳහන් කරයි.
ආරක්ෂක හේතූන් මත ප්රතිමාව ඉවත් කළ බවත්, එය අද නැවත ස්ථාපනය කරන බවත් අමාත්යවරයා පාර්ලිමේන්තුවේදී ලැජ්ජාවෙන් තොරව ප්රකාශ කළ විට, සියලු ජනතාවට එක හා සමානව සැලකීමේ රජයේ ප්රකාශ බිඳවැටුණු බව සුමන්තිරන් තවදුරටත් පෙන්වාදෙයි.
“අතීතයේ වෙනත් කිසිදු රජයකට වඩා වෙනස් නොවන ජාතිවාදී, සිංහල බෞද්ධ ජාතිකවාදී බලවේගයක් ලෙස ජාතික ජන බලවේග ආණ්ඩුව නිරාවරණය වී ඇත. ත්රිකුණාමලය මන්ත්රී සහ නියෝජ්ය අමාත්ය අරුන් හේමචන්ද්ර ඇතුළු ජාතික ජන බලවේගයේ සියලුම දෙමළ සාමාජිකයන් වහාම ඉල්ලා අස්විය යුතුය,” යැයි ඔහු තවදුරටත් පවසයි.
