රුපියල් මිලියන 59.6කට අධික ඉඩම් සහ දේපළ නීති විරෝධී ලෙස අත්පත් කරගෙන සන්තකයේ තබා ගැනීම සම්බන්ධ නඩුවක දෙවැනි විත්තිකාරිය වන ඩේසි ෆොරස්ට් යන අය 2016 වසරේ සිට ඩිමෙන්ෂියා රෝගයෙන් පෙළෙන බවට කරන ප්‍රකාශ සම්බන්ධයෙන් සම්පූර්ණ වෛද්‍ය මණ්ඩලයකින් වාර්තාවක් ලබා ගන්නැයි නියෝග කරන ලෙස නියෝජ්‍ය සොලිසිටර් ජනරාල් ජනක බණ්ඩාර පසුගියදා කොළඹ මහාධිකරණයෙන් ඉල්ලා සිටියේය.

2016 වසරේ සිට ඇය මෙම රෝගයෙන් පෙළෙන බව ඇයගේ නීතිඥවරුන් පැවසුවද, මේ සම්බන්ධයෙන් කිසිදු තොරතුරක් මීට පෙර ඉදිරිපත් කර නොමැති බව ඔහු සඳහන් කළේය.

තම සේවාදායකයා ඩිමෙන්ෂියා රෝගයෙන් පෙළෙන බැවින් නඩුව ඉදිරියට ගෙන යෑමට උපදෙස් ලබා ගැනීම දුෂ්කර වී ඇති බවට ෆොරස්ට් වෙනුවෙන් පෙනී සිටි ජනාධිපති නීතිඥ අනිල් ද සිල්වා ප්‍රකාශ කිරීමෙන් පසුව නියෝජ්‍ය සොලිසිටර් ජනරාල් බණ්ඩාර මෙම ඉල්ලීම සිදු කළේය.

රුපියල් මිලියන 59.6කට අධික ඉඩම් සහ දේපළ නීති විරෝධී ලෙස අත්පත් කරගෙන සන්තකයේ තබා ගැනීම සම්බන්ධයෙන් පළමු විත්තිකරු වන හිටපු ජනාධිපති මහින්ද රාජපක්ෂගේ පුත් යෝෂිත රාජපක්ෂට එරෙහිව ගොනු කර ඇති නඩුවේ දෙවැනි විත්තිකාරිය ඩේසි ෆොරස්ට්ය.

මහාධිකරණ විනිසුරු උදේෂ් රණතුංග ඉදිරියේ නඩුව කැඳවූ අවස්ථාවේදී, ද සිල්වා නීතිඥවරයා තවදුරටත් අධිකරණයට පැවසුවේ තම සේවාදායකයා පල්ලියේ ඉරිදා දේව මෙහෙයට සහභාගී වන බව සිතා අධිකරණයට පැමිණෙන බවයි.

එබැවින්, ඇයගේ සෞඛ්‍ය තත්ත්වය සැළකිල්ලට ගෙන ඇයව නඩුවෙන් නිදහස් කරන ලෙස ඔහු අධිකරණයෙන් ඉල්ලා සිටියේය.

ෆොරස්ට්ගේ සෞඛ්‍ය තත්ත්වය හේතුවෙන් ඇයගේ නමින් ලියාපදිංචි කර ඇති ඉඩම් සහ දේපළ ස්වාධීනව පාලනය කළ නොහැකි බවට නුගේගොඩ දිස්ත්‍රික් අධිකරණය නියෝගයක් ද ලබා දී ඇති බවත්, අධිකරණ නියෝගයට අනුව, ඇය වෙනුවෙන් ඇයගේ දේපළ හැසිරවීමට වෙනත් පුද්ගලයකු පත් කර ඇති බවත් ඔහු පැවසීය.

කෙසේවෙතත්, 2016 දී කඩුවෙල මහේස්ත්‍රාත් අධිකරණය ඉදිරියේ ප්‍රකාශයක් කරන විට විත්තිකරු මෙම කාරණය හෙළි නොකළ බවට නියෝජ්‍ය සොලිසිටර් ජනරාල් බණ්ඩාර සඳහන් කළේය.

නඩුවේ වත්කම් දෙවැනි විත්තිකරුගේ නමින් තිබුණද, වත්කම් මිලදී ගැනීම සඳහා ඇයට මුදල් ලබා දුන්නේ පළමු විත්තිකරු බවත්, ඇයව නඩුවෙන් නිදහස් කිරීමෙන් වෙනත් පාර්ශවයකට අනවශ්‍ය වාසියක් ලැබෙන බවත්, එයට ඉඩ නොදිය යුතු බවත් ඔහු තර්ක කළේය.

විනිසුරුවරයා කළ විමසීමකදී අපරාධ පරීක්ෂණ දෙපාර්තමේන්තුව පැවසුවේ විත්තිකරු ඇයගෙන් ප්‍රකාශයක් සටහන් කර ගැනීමේදී ඇයගේ ඩිමෙන්ෂියා තත්ත්වය පිළිබඳ කිසිදු සඳහනක් කර නොමැති බවයි.

ඉදිරිපත් කරන ලද කරුණු සළකා බැලූ මහාධිකරණ විනිසුරු රණතුංග, විත්තිකරු නඩුවෙන් නිදහස් කළ යුතුද නැද්ද යන්න පිළිබඳ නීතිපතිවරයාගේ ස්ථාවරය අධිකරණයට දැනුම් දෙන ලෙස පැමිණිල්ලට නියෝග කළේය.

රජයේ නීතිඥ ඔස්වල්ඩ් ලක්ෂ්මන් පෙරේරා, නියෝජ්‍ය සොලිසිටර් ජනරාල් ජනක බණ්ඩාර සමඟ පැමිණිල්ල වෙනුවෙන් පෙනී සිටියේය.

යෝෂිත රාජපක්ෂ වෙනුවෙන් ජනාධිපති නීතිඥ සම්පත් මෙන්ඩිස් පෙනී සිටියේය.