November 15, 2025
‘ප්‍රජා ශක්ති’ ජාතික වැඩසටහන යටතේ දිවයින පුරා පිහිටි සියලුම දිස්ත්‍රික් ලේකම් කාර්යාල සහ ප්‍රාදේශීය ලේකම් කාර්යාල සඳහා රජය රුපියල් මිලියන 01 බැගින් වෙන්කර තිබේ.
ජනාධිපති කාර්යාලයට අනුව, මෙම අරමුදල් ලැප්ටොප් සහ පරිගණක ඇතුළු අවශ්‍ය තොරතුරු තාක්ෂණ දෘඩාංග සහ සේවා ප්‍රසම්පාදනය කිරීමට සහ නිලධාරීන්ගේ අදාළ ධාරිතාව ගොඩනැගීම සඳහා යොදවනු ඇත.
වත්මන් රජයේ ප්‍රධාන බලාපොරොත්තුවක් වන්නේ වන්නේ මහජනතාවට වඩාත් කාර්යක්ෂම හා උසස් තත්ත්වයේ සේවාවක් ලබා දීම සඳහා රාජ්‍ය සේවය නවීකරණය කිරීමයි.
එහි ප්‍රතිඵලයක් ලෙස, යල් පැන ගිය ක්‍රමවේද සහ උපකරණ ප්‍රතිස්ථාපනය කරමින් ඩිජිටල් තාක්ෂණය භාවිත කරන රාජ්‍ය සේවයක් ස්ථාපිත කිරීමට දැනට උත්සාහයන් ක්‍රියාත්මක වෙමින් පවතී.
තවද, මෙම වැඩසටහන කොළඹට පමණක් සීමා නොවී දිවයිනේ සියලුම ප්‍රදේශවල රාජ්‍ය ආයතන පද්ධතියටම ක්‍රමයෙන් ව්‍යාප්ත කිරීම රජයේ අපේක්ෂාවයි.
ඒ අනුව, ‘ප්‍රජා ශක්ති’ ජාතික වැඩසටහන, ඩිජිටල් ආර්ථික අමාත්‍යාංශය සමඟ එක්ව, දිස්ත්‍රික් හා ප්‍රාදේශීය පරිපාලන යාන්ත්‍රණයන් නවීකරණය කිරීම සඳහා රුපියල් මිලියන 369ක ප්‍රතිපාදන සකස් කර ඇත.
කලාපීය තොරතුරු තාක්ෂණ හැකියාවන් වර්ධනය කිරීම සඳහා මේ ආකාරයට සෘජුවම අරමුදල් වෙන් කර ඇති පළමු අවස්ථාව මෙයයි.
රජයේ ආයතනවල තොරතුරු තාක්ෂණ භාවිතය වැඩි දියුණු කිරීම සඳහා අවශ්‍ය සෘජු ආයෝජන මට්ටම වැඩි කිරීමට සහ වාර්ෂිකව අයවැයෙන් ඒ සඳහා අරමුදල් වෙන් කිරීමට ද රජය අපේක්ෂා කරයි.
‘ප්‍රජා ශක්ති’ ජාතික වැඩසටහන යටතේ ක්‍රියාත්මක කිරීමට සුදුසු සංවර්ධන ව්‍යාපෘති යෝජනා හඳුනා ගැනීම සහ එම අදාළ ව්‍යාපෘතිවල ප්‍රගතිය සමාලෝචනය කිරීම වැනි කළමනාකරණ කටයුතු ඩිජිටල් වේදිකාවක් හරහා සිදු කරනු ඇතැයි අපේක්ෂා කෙරේ.
මේ සඳහා අවශ්‍ය තොරතුරු තාක්ෂණ පද්ධතිය මෑතකදී දියත් කරන ලදී.
මේ හරහා, රජය තම ග්‍රාමීය හා ප්‍රාදේශීය සංවර්ධන වැඩසටහන් කාර්යක්ෂමව ක්‍රියාත්මක කිරීම සහ ඒවා ජනතාවට ප්‍රවේශ විය හැකි වන පරිදි විනිවිදභාවයෙන් යුතුව ක්‍රියාත්මක කිරීම අරමුණු කර තිබේ.
