මෙරට සෑම වැඩිහිටියන් පස්දෙනකුගෙන් එක් අයකුම දියවැඩියාවෙන් පෙළෙන අතර, ඔවුන්ගෙන් තිදෙනෙකුගෙන් එක් අයෙකුට අක්ෂි ආශ්‍රිත සංකූලතා ඇතිවීමේ අවදානමක් ඇති බව සෞඛ්‍ය අංශ අනතුරු අගවයි.

සෞඛ්‍ය ප්‍රවර්ධන කාර්යාංශය විසින් සංවිධානය කරන ලද ජනමාධ්‍ය හමුවක් අමතමින් ජාතික අක්ෂි රෝහලේ අක්ෂි වෛද්‍ය උපදේශක වෛද්‍ය කපිල බන්දුතිලක පැවසුවේ, ශ්‍රී ලංකාවේ වැඩිහිටියන් අතර දියවැඩියාව පැතිරීම 23% ත් 30% ත් අතර මට්ටමේ පවතින බවට ඇස්තමේන්තු කර ඇති බවයි.

ගෝලීය වශයෙන්, වැඩිහිටියන් නවදෙනකුගෙන් එක් අයෙකුට දියවැඩියාව ඇති බව හඳුනාගෙන ඇති බවත්, මෙරට දත්ත අනුව දළ වශයෙන් පස්දෙනෙකුගෙන් එක් අයෙකුට එය බලපාන බවත් වෛද්‍යවරයා පැවසුවේය.

එමෙන්ම ඔහු පෙන්වාදුන්නේ, දියවැඩියා රෝගීන්ගෙන් තුනෙන් එකකට අක්ෂි රෝග ඇති වන අතර, ප්‍රතිකාර නොකළහොත් 11% ක් අන්ධභාවයට පත්වීමේ අවදානමක් ද පවතින බවයි.

දියවැඩියාව යනු ඇස්වල පෙනීමට සැලකිය යුතු ලෙස බලපෑම් එල්ල කරන රෝගයක් බව පෙන්වාදුන් වෛද්‍ය බන්දුතිලක පැවසුවේ, විශේෂයෙන් එය වැඩකරන වයස් කාණ්ඩයේ ජනගහනය අතරට පැමිණි විට, එමඟින් ඇස්තමේන්තුගත වාර්ෂික ආදායම රුපියල් මිලියන 923 ක් අහිමි වන බවයි.

එමෙන්ම වෛද්‍ය කපිල බන්දුතිලක පැවසුවේ, ජාතික අක්ෂි රෝහලේ දියවැඩියා අක්ෂි සායනයේ සිටින බොහෝ රෝගීන් වයෝවෘද්ධ පුද්ගලයන් නොවන බව සහ වයස අවුරුදු 40 ත් 50 ත් අතර වයස් සීමාවේ පසුවන පුද්ගලයන් ද ඒ අතර සිටින බවයි.

රෝගය කල්තියා හඳුනාගැනීම, ජීවන රටාවේ වෙනස්කම් සහ නිසි ප්‍රතිකාර මගින් තත්වය කළමනාකරණය කිරීමට හෝ වළක්වා ගැනීමට හැකියාව පවතින බව ද ඔහු පෙන්වාදුන්නේය.