චෙම්මනි සිත්තුපත්ති හින්දු සුසාන භූමිය අසල කැණීම්වලින් මේ දක්වා සොයා ගෙන ඇති මිනිස් ඇටසැකිලි 42න් තුනක්වත් දරුවන්ගේ බවට සැක කෙරේ.

කැණීම් කණ්ඩායම මෙම සතියේ අඩි 11ක් දිග සෘජුකෝණාස්‍රාකාර හැඩැති ස්ථානයක් පිරිසිදු කිරීමේදී ඇඳුමක්, බෑගයක්, සෙරෙප්පු සහ සෙල්ලම් බඩුවක් ද සොයා ගන්නා ලදී.

ශ්‍රී ලංකා නීතිඥ සංගමයේ උතුරු ප්‍රදේශය නියෝජනය කරන නීතිඥ වී. එස්. නිරන්ජන් වාර්තාකරුවන්ට පැවසුවේ තවත් මිනිස් දේහයන් තැන්පත් කර ඇති බවට සැක කෙරෙන ස්ථාන දෙකක කැණීම් ක්‍රියාවලිය සිදු කරන බවයි.

යාපනය මහේස්ත්‍රාත් අධිකරණය විසින් නිකුත් කරන ලද නියෝගයෙන් පසු කැණීමේ දෙවැනි අදියර පසුගිය දින දහය පුරා අඛණ්ඩව සිදුවෙමින් පවතී.

කැණීම් අතරතුර, සොයා ගන්නා ලද සම්පූර්ණ මිනිස් ඇටසැකිලි 37ක් අධිකරණ භාරයේ තිබේ.

සුසාන භූමිය අයත් නල්ලූර් ප්‍රාදේශීය සභාව නියෝජනය කරන නීතිඥ වී. මනිවන්නන් ද සිදුවෙමින් පවතින කැණීම් ක්‍රියාවලිය සිකුරාදා නිරීක්ෂණය කළේය.

“එක් ස්ථානයක, හිස් කබල් පහක් සහ අර්ධ මිනිස් සිරුරු කොටස් එකට වළලනු ලැබ ඇති බව සලකුණු කර තිබෙනවා, ඒ අසල ප්‍රදේශයේ තවත් මළ සිරුරු තැන්පත් කර ඇති බවට සැක කෙරෙන නිසා ඒ 9 මාර්ගයට ආසන්නව එම යාබද ප්‍රදේශයේ කැණීම් තවදුරටත් සිදුවනු ඇතැයි අපි බලාපොරොත්තු වෙනවා,” යැයි ඔහු පැවසීය.

“මළ සිරුරු අක්‍රමවත් ලෙස වළලනු ලැබ ඇති බවත්, එම සිරුරුවල කිසිදු ඇඳුමක් හෝ වස්තුවක් නොමැති බවත් අපිට පේනවා. ඒ අතරින්, මළ සිරුරු තුනක් දරුවන්ගේ බවට සැක කෙරෙනවා,” මනිවන්නන් පැවසීය.

මේ අතර, නාවට්කුලි ප්‍රදේශයේ අතුරුදහන් වූ පුද්ගලයන් තිදෙනෙකු වෙනුවෙන් ගොනු කරන ලද මැන්ඩමස් ආඥාවක් ජූලි 11 වැනි දින චාවකච්චේරි මහේස්ත්‍රාත් අධිකරණයේදී විභාගයට ගැනීමට නියමිතය.