විදේශ සේවා නියුක්ති කාර්යාංශයට අනුව විදේශ රැකියා අවස්ථා සඳහා ශ්‍රී ලාංකිකයන් 240,000කට අධික පිරිසක් මේ වසර තුළ රටින් පිටව ගොස් තිබේ.

2023 සැප්තැම්බර් මාසයට සාපේක්ෂව මේ වසරේ සැප්තැම්බර් මාසයේදී පමණක් ශ්‍රී ලාංකිකයන් විදේශ රැකියා සඳහා පිටත්ව යෑම 10%කින් ඉහළ ගොස් ඇති බව එම කාර්යාංශය පවසයි.

ජනවාරි සිට සැප්තැම්බර් දක්වා කාලය තුළ ශ්‍රී ලාංකික පුරවැසියන් 240,109ක් විදේශයන්හි සේවය කර ඇති බව විදේශ සේවා නියුක්ති කාර්යාංශයේ දත්ත වාර්තා කරයි.

ඒ අතරින් 99,939ක් කාන්තා වන අතර පිරිමි පුද්ගලයන්142,170ක් ද විදෙස්ගත වී ඇත.

වසරේ මුල් මාස නවය තුළ පිරිමි ශ්‍රමිකයන් 62,177ක් සහ කාන්තා ශ්‍රමිකයන් 8,219ක් ඇතුළුව පුහුණු ශ්‍රමිකයන් 70,396ක් රැකියා සඳහා රට හැර ගොස් ඇත.

ශ්‍රමිකයන් 17,649ක් පමණ වෘත්තීය රැකියා සඳහා විදේශගත වී ඇති බවට වාර්තා වී ඇති අතර, ශ්‍රී ලාංකිකයන් 3,704ක් අර්ධ පුහුණු රැකියා සඳහා ගොස් තිබේ.

ශ්‍රී ලංකා විදේශ සේවා නියුක්ති කාර්යාංශය ප්‍රකාශ කරන්නේ මේ වසරේ වැඩිම ශ්‍රී ලාංකිකයන් පිරිසක් සංක්‍රමණය වී ඇත්තේ සෞදි අරාබිය දෙසට වන අතර, මෙම වසරේ මුල් මාස නවය තුළදී විදේශීය ශ්‍රමිකයන් 38,133ක් එරටට ගොස් ඇති බවයි.

එසේම, ශ්‍රී ලාංකිකයන් 6,391ක් ඊශ්‍රායලයට ද, තවත් 6,925ක් ජපානයට ද, 5,870ක් දකුණු කොරියාවට ද, 5,677ක් කුවේට් වෙත ද, 3,995ක් එක්සත් අරාබි එමීර් රාජ්‍යයට ද සංක්‍රමණය වී ඇති බව වාර්තා වේ.

මාලඹේ ශ්‍රී ලංකා තොරතුරු තාක්ෂණ ආයතනයේ (SLIIT) සඳුනිමා කළුආරච්චි සහ රුවන් ජයතිලක යන පර්යේෂකයන් විසින් මෙම වසර මුලදී කරන ලද අධ්‍යයනයකට අනුව, රටේ තරුණ තරුණියන් විශාල ප්‍රමාණයක් සාමාන්‍යයෙන් අධ්‍යාපන කටයුතු සඳහා විදේශගත වීමට නැඹුරු වෙති.

එම අධ්‍යයනයේ මෙසේ ද සඳහන් වේ: “තවත් කැපී පෙනෙන සංක්‍රමණ ප්‍රවණතාවක් නම්, තරුණ තරුණියන් විදේශ අධ්‍යාපනය සඳහා පිටතට යෑමයි. මෙම ප්‍රවණතාවය අදාළ වන්නේ රජයට ඔවුන්ගේ ප්‍රාථමික අධ්‍යාපනය සඳහා කරන ආයෝජනයෙන් ප්‍රතිලාභයක් නොලැබිය හැකි වනවා සේම එමඟින් රටේ සංවර්ධනයට ඔවුන්ගේ දායකත්වය ලබා ගැනීමට නොහැකි විය හැකි වීමයි.”

පසුගිය දශක දෙක තුළ, සංවර්ධනය වෙමින් පවතින රටවල සිට සංවර්ධිත රටවලට විදෙස් සිසුන් බඳවා ගැනීමේ වර්ධනයක් සිදුව ඇති බවත් 1998-2018 කාලයට සාපේක්ෂව එම වැඩිවීම 186%ක වැඩිවීමක් වේ.

ඊට අමතරව ජනවාරි මාසයේ සිට ශ්‍රී ලාංකික හෙද වෘත්තිකයන් 868 දෙනෙකුට පමණ ඊශ්‍රායලයේ රැකියා අවස්ථා ලැබී ඇත.

ඊශ්‍රායලයේ නිවාස පාදක හෙද රැකියා අවස්ථා ලැබූ කාන්තාවන් 21 දෙනෙකු සඳහා ඔක්තෝබර් 4 වැනි දින කාර්යාංශයේදී ගුවන් ටිකට්පත් ප්‍රදානය කළ බව ශ්‍රී ලංකා විදේශ සේවා නියුක්ති කාර්යාංශය පවසයි.

මෙම පිරිස ඊශ්‍රායල හෙද රැකියා ලැබූ 135 වැනි කණ්ඩායම වන අතර ඔවුන් හෙට (7) ඊශ්‍රායලය බලා පිටත්ව යෑමට නියමිතය.