May 19, 2023
පසුගියදා කුරුණෑගල ප්‍රදේශයෙන් වාර්තා වූ ළමා අපචාර සිද්ධිය හුදු ‘කතාවක්’ පමණක් බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව ප්‍රකාශ කරයි.
මෙම පුවත නිසා ජනතාව අතර යම් නොසන්සුන්තාවක් ඇතිවුවද, අදාළ දරුවා ලිංගික අපචාරයකට ලක්වූ බවට කිසිදු සාක්ෂියක් විමර්ශනවලදී හෙළිවී නැති බවද පොලිස් මාධ්‍ය ප්‍රකාශකවරයා සඳහන් කරයි.
කුරුණෑගල – යන්තම්පලාව ප්‍රදේශයේ පෞද්ගලික ලීසිං ආයතනයකදී මානසික ආබාධයකින් පෙළෙන 14 හැවිරිදි දරුවකු ලිංගික අතවර කළ බව පැවසීමත් සමඟ එම ප්‍රදේශයේ නොසන්සුන්කාරී තත්ත්වයක් වාර්තා වූ බවද පොලිස් මාධ්‍ය ප්‍රකාශකවරයා පවසයි.
14 හැවිරිදි දරුවා කාත්තන්කුඩි ප්‍රදේශයේ පදිංචිකරුවෙකු වන අතර වෛද්‍ය ප්‍රතිකාර ලබමින් සිටින අතර එම කාලය තුළ දෙමාපියන් සහ භාරකරුවන් නොදන්නා අයුරින් කුරුණෑගල ප්‍රදේශයට ගොස් ඇති බව පරීක්ෂණවලදී අනාවරණය වී ඇති බව ජ්‍යෙෂ්ඨ පොලිස් අධිකාරී තල්දූව සඳහන් කරයි.
මෙම දරුවා යතුරුපැදියක් මිලදී ගැනීමට අවශ්‍ය බව පවසමින් ලීසිං ආයතනයට පැමිණ, අලෙවිය ප්‍රතික්ෂේප කිරීම නිසා පිටතට ගොස් තමාට එම ආයතනය තුළ ලිංගික අතවර කළ බව ප්‍රකාශ කර ඇතැයි වාර්තා වේ.
ඉන් අනතුරුව ආයතනයට පිටතින් මහජනතාව රැස්ව සිටීමත් සමඟ නොසන්සුන්කාරී තත්ත්වයක් ඇති වූ අතර තත්ත්වය පාලනය කිරීමට පොලිසියද යොදවා තිබිණි.
ජ්‍යෙෂ්ඨ පොලිස් අධිකාරී නිහාල් තල්දූව පැවසුවේ ලිංගික අපයෝජනය පිළිබඳ ප්‍රකාශය ව්‍යාජ එකක් බවට පරීක්ෂණවලින් අනාවරණය වී ඇති බවත් එවැනි සිදුවීමක් සිදුවී නොමැති බවට සීසීටීවී දර්ශනවලින් අනාවරණය වී ඇති බවත්ය.
ලිංගික අපයෝජන චෝදනාව තහවුරු කර ගැනීම සඳහා වෛද්‍ය පරීක්ෂණයක් පවත්වන අතර දරුවා රෝහල් ගත කර ඇති බව ඔහු වැඩිදුරටත් පැවසීය.
මෙම සිද්ධිය සම්බන්ධයෙන් සමාජ මාධ්‍ය ඔස්සේ ප්‍රචාරය වන තොරතුරු අසත්‍ය බව ද පොලිස් මාධ්‍ය ප්‍රකාශකවරයා වැඩිදුරටත් සඳහන් කළේය.
