NDB බැංකුවේ සිදුවූ රුපියල් බිලියන 13 ක දැවැන්ත මූල්‍ය වංචාවට අදාළ මුදල් විදේශ රටවලට මාරුකර තිබේද සහ එමඟින් රටේ විදේශ විනිමය සංචිත දැඩි ලෙස ක්ෂය වීමට බලපෑමක් සිදුවී තිබේද යන්න හඳුනාගැනීම සඳහා පොලිස් මූල්‍ය අපරාධ විමර්ශන කොට්ඨාසය (FCID) මඟින් විශේෂ වාර්තාවක් සකස්කරමින් පවතී.

මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල Sunday Times Business වෙත ප්‍රකාශ කර ඇත්තේ, පෑලියගොඩ ප්‍රදේශයේදී ත්‍රිරෝද රථයක් තුළ තිබී රුපියල් මිලියන 30 ක මුදලක් සොයාගැනීමෙන් පසු ආරම්භ වූ විමර්ශනවලදී මෙම මහාපරිමාණ ජාවාරම අනාවරණය කරගත් බවයි.

NDB බැංකුව ද ඇතුළුව 2023 වසරට පෙර සිටම ක්‍රියාත්මක වූ පුළුල් වංචනික ජාලයක් පිළිබඳ තොරතුරු මෑතකදී තමන් පාර්ලිමේන්තුවේදී ද අනාවරණය කළ බව අමාත්‍යවරයා සඳහන් කර ඇත.

එම අවස්ථාවේදී ලැබී තිබූ තොරතුරුවලට අනුව, NDB බැංකුවට අයත් අරමුදල්වලින් කොටසක් විදේශ රටවලට ද යවා ඇති බවට FCIDය තමන්ව දැනුවත් කර තිබූ බව ද අමාත්‍යවරයා වැඩිදුරටත් පවසයි.

මෙම වංචනික ක්‍රියාවලිය 2023 වසරේ සිට බැංකු 13 ක පවත්වාගෙන ගිය ගිණුම් 227 ක් හරහා, ව්‍යාජ ටෙලිග්‍රාෆ් හුවමාරු (TT) 26,108 ක් මාර්ගයෙන් සිදුකර තිබේ.

“විදේශයන්හි පවත්වාගෙන යන ව්‍යාජ ගිණුම් වෙත ටෙලිග්‍රාෆ් හුවමාරු (TT) මඟින් කොපමණ මුදලක් යවා ඇත්ද, නැතහොත් මේ ආකාරයෙන් කිසියම් මුදලක් විදේශගත කර තිබේද යන්න නිශ්චිතවම තහවුරු කරගැනීම සඳහා FCIDය වැඩිදුර පරීක්ෂණ පවත්වනවා,” යැයි ඇමැති විජේපාල ප්‍රකාශ කර ඇත.

මේ අතර, මහබැංකුවේ අධීක්ෂණය යටතේ ඩෙලොයිට් ටච් ටොහ්මාට්සු ඉන්දියා (Deloitte Touche Tohmatsu India LLP) ආයතනය විසින් NDB බැංකුවේ සිදුවූ රුපියල් බිලියන 13.2 ක මෙම අභ්‍යන්තර වංචාව සම්බන්ධයෙන් සිදුකරනු ලබන ස්වාධීන අධිකරණ වෝහාරික විගණනය මේ මස අවසානය වන විට නිමකිරීමට නියමිත බව NDB බැංකු නිලධාරීහු පවසති.

මෙම පරීක්ෂණය මඟින් පසුගිය වසර 10 ක කාලය පුරා සිදුව ඇති සැකකටයුතු ගනුදෙනු පරීක්ෂාවට ලක් කෙරෙන අතර, එහි අතුරු වාර්තාවේ සොයාගැනීම් දැනටමත් මධ්‍යම බැංකුව වෙත ඉදිරිපත් කර ඇත.