June 25, 2026
මැතිවරණවලදී ඡන්දදායකයින්ගේ ඇඟිලි සලකුණු කිරීම සඳහා නොමැකෙන තීන්ත භාවිතය අත්හිටුවීමට ගෙන ඇති තීරණය හේතුවෙන් එක් මැතිවරණයකින් රජයට රුපියල් මිලියන 100කට ආසන්න මහජන මුදලක් ඉතිරි කරගත හැකි වනු ඇතැයි නිදහස් හා සාධාරණ මැතිවරණයක් සඳහා වූ ජනතා ව්යාපාරයේ විධායක අධ්යක්ෂ රෝහණ හෙට්ටිආරච්චි පවසයි.
මාධ්ය හමුවකදී අදහස් දැක්වූ ඔහු මෙම තීරණය පැසසුමට ලක් කළ අතර, මැතිවරණ පාර්ශවකරුවන්, දේශපාලන පක්ෂ සහ සිවිල් සංවිධාන අතර වසර ගණනාවක සිට සාකච්ඡා වෙමින් පැවති ධනාත්මක පියවරක් ක්රියාවට නැංවීමක් ලෙස මෙය හඳුන්වා දුන්නේය.
නොමැකෙන තීන්ත භාවිතය ඉවත් කිරීම මඟින් එය විදේශයන්ගෙන් ආනයනය කිරීම, බෙදා හැරීම සහ ඒ ආශ්රිත පරිපාලන ක්රියාවලීන් සඳහා වැයවන පිරිවැය සැලකිය යුතු ලෙස අඩු කර ගත හැකි අතර, එමඟින් සමස්ත මැතිවරණ වියදම පහත වැටෙනු ඇති බව ද ඔහු සඳහන් කළේය.
වත්මන් මැතිවරණ ක්රමය තුළ ජාතික හැඳුනුම්පත අනිවාර්ය කිරීම සහ ඡන්ද හිමි නාමලේඛන සකස් කිරීමේදී භාවිත කරන නවීන තාක්ෂණික දියුණුව හේතුවෙන් ඡන්දදායකයින් සත්යාපනය කිරීමේ ක්රියාවලිය වඩාත් ශක්තිමත් වී ඇති බව ද ඔහු මෙහිදී පෙන්වා දුන්නේය.
මේ නිසා හොර ඡන්ද දැමීම හෝ වෙනත් අයෙකු ලෙස පෙනී සිටිමින් ඡන්දය ප්රකාශ කිරීමේ සම්භාවිතාව ඉතා අවම මට්ටමක පවතින බැවින්, මැතිවරණ වංචාවලට එරෙහිව පවතින වත්මන් ආරක්ෂණ ක්රමවේද හමුවේ වසර ගණනාවක සිට පැවති මෙම තීන්ත ගෑමේ සම්ප්රදාය තවදුරටත් අත්යවශ්ය නොවන බව ද ඔහු වැඩිදුරටත් අවධාරණය කළේය.
